fabrikazio aurreratuaren eta digitalaren epizentro bihurtu da AFM Clusterren eskutik

Iñigo Urkullu Lehendakariak, Markel Olano Gipuzkoako Ahaldun Nagusiak, Eneko Goia Donostiako Alkateak eta Unibertsitateetako eta I+G+Bko estatu idazkariak inaugurazio ekitaldian parte hartu dute

“Automobilgintzaren etorkizuna eta erronkak” inaugurazio-aurkezpena Francisco J. Riberasek, Gestamp-eko presidente exekutiboak egin du

Urriaren 23tik 25era bitartean, Donostiako hiriburuak digitalizazioan, fabrikazio gehigarrian, aeronautikan, automobilgintzan, startupetan edo talentu erakargarrian adituak jasoko ditu

Beste urte batez, Donostia fabrikazio aurreratuaren eta digitalaren hiriburua bihurtu da AFM Cluster-ek atzo hasitako biltzar zientifiko eta informatiboaren 22. edizioaren eskutik. Hiru egunetan zehar, abangoardiako fabrikazio teknologien inguruko gaietan adituak Donostiara etorriko dira, aurkezpenak, hitzaldiak, eztabaidak, B2B topaketak eta erakusketa gunea uztartzen dituen biltzarrera.

César Garbalenak, AFM Clusterreko presidenteak, azaldu du ordezkatzen duen sektorea “industriaren bihotza eta bere lehiakortasunerako gakoa” dela. Horrez gain, esan du biltzarra lehen ordenako hitzordu industriala dela, punta-puntako aurkezpenak eskaintzen dituena eta egungo gai nagusiak modu didaktiko, dibertigarri eta erakargarrian jorratzen dituela.

Lehendakariak bere hitzaldian nabarmendu du, biltzarrak industriaren erronkak eta joerak eta haiekin batera hazten ari den sektorearen egoera aztertzea ahalbidetzen duela, baina industria ez dela egoera ekonomiko globalaren zailtasunetatik kanpo geratzen. Gainera, biltzarraren antolaketa eskertu du, “erronkak partekatzeko eta gure industrian ahaleginak batzeko aukera gisa”.

Francisco J. Riberasek, Gestamp-eko presidente exekutiboak, aurkeztu duen lehen hitzaldia automobilgintzaren etorkizunari eta erronkei eskaini die. Haren atzetik, “E-mugikortasuna” izeneko saioa burutu dute José Manuel Cubert ibilgailu elektrikoan adituak, Valeo-ko Marisa Miedesek eta Vicomtech-eko Jorge Posadak.

Hurrengo saioak fabrikazio aurreratuaren digitalizazioari aurre egin dio, Berger Gruppe-ko, Siemenseko eta ISG-ko adituen eskutik. Arratsaldeko saioa digitalizazioaren aurrerapen nagusiak erakutsi dituzten makina-erreminta fabrikatzaileen parte-hartzearekin osatu da.

Ostegunean eta ostiralean zehar, fabrikazio gehigarria, sektore aeronautikoko manufaktura joerak, industria ekosistemaren startupak sortzea eta garatzea, eta industriara talentua erakartzeko beharra izango dira aztergai.

Urriaren 25ean, ostiralean, burutuko den itxiera ekitaldian, Magomore hizlariak hartuko du parte eta sari banaketa ospatuko da.

Biltzarrak erakusketa-gunea izango du eta bertan Fagor Automation, Tecnalia, UPV, Sicnova, Integral PLM, Maquinser, Nuavis edo Oretek bezalako erakundeek hartuko dute parte.