AFM Clusterrek 80 urteko historia ospatu du, industriaren etorkizunari aurrea hartuz
“Fast Movers” lelopean, AFM Clusterrak bere 80. urteurrena ospatu zuen, eta bertan 400 lagun baino gehiago bildu ziren, besteak beste, erakundeko enpresa bazkideetako ordezkariak, erakunde publikoetako ordezkariak, laguntzaileak eta industriarekin lotutako profesionalak. Ospakizunak 1946an hasi zen ibilbidea gogoratzeko balio izan zuen, baina, batez ere, etorkizunera begiratzeko eta AFM Clusterrak gero eta azkarrago eraldatzen ari den industria bati aurre egiteko duen ikuspegia partekatzeko antolatu zen
Lankidetza, abiadura eta taldea izan ziren ospakizunaren ardatz nagusiak. Hiru kontzeptu horiek laburbiltzen dute “Fast Movers” filosofiaren funtsa, eta AFM Clusterrak azpimarratu nahi izan zuen aldaketei aurrea hartzearen garrantzia, gero eta konplexuagoak diren erronkei elkarrekin aurre egitearen beharra eta pertsonak edozein eraldaketa-prozesuren erdigunean kokatzearen balioa.
Ekitaldian, AFM Clusterreko zuzendari nagusi Xabier Ortuetak erakundearen bilakaera errepasatu zuen eta gaur egun fabrikazio aurreratuak dituen erronka nagusietako batzuk azaldu zituen. Bere hitzartzean, AFMren 80 urteko historia industriak bizi duen eraldaketa-prozesuarekin lotu zuen, baita azkartasunez, lankidetzaz eta egokitzeko gaitasunez aurrera egiten jarraitzeko beharrarekin ere.
Carmen Pinto AFM Clusterreko presidenteak, berriz, zortzi hamarkadotan erakundea eraiki duten pertsonak eta enpresak jarri zituen erdigunean. Bere hitzaldia bereziki lotuta egon zen taldearen kontzeptuarekin, jardunaldiaren hiru ardatz nagusietako batekin, eta datozen urteetako erronkei aurre egiteko gai izango den proiektu kolektibo bat indartzen jarraitzearen garrantziarekin.
Ekitaldian parte hartu zuten, halaber, Jordi Hereu Industria eta Turismoko ministroak; Eider Mendoza Gipuzkoako ahaldun nagusiak; Jon Insausti Donostia-San Sebastiángo alkateak; eta Mikel Jauregi Eusko Jaurlaritzako Industria, Trantsizio Energetiko eta Jasangarritasun sailburuak. Haien hitzartzeek industriaren garrantzi estrategikoa, enpresen eta erakundeen arteko lankidetza eta fabrikazio aurreratuak garapen ekonomiko eta sozialean duen eginkizuna nabarmendu zituzten.
Haiekin batera, beste hainbat ordezkari instituzional eta ekonomia- nahiz enpresa-eremuko ordezkari ere izan ziren bertan, AFM Clusterren 80. urteurrenaren ospakizunean laguntzeko: Unai Andueza, Gipuzkoako Ekonomia Sustapeneko eta Proiektu Estrategikoetako foru diputatua; Andoitz Korta, Eusko Jaurlaritzako Industria Sustapeneko sailburuordea; Pablo Conde, ICEXeko Nazioarteko Negozio Garapeneko zuzendari nagusia; eta Marisol Garmendia, Espainiako Gobernuak Euskadin duen ordezkaria.
Sortu zenetik laurogei urte igaro direnean, AFM Clusterrak gaur egun bederatzi industria-elkarte eta fabrikazio aurreratu eta digitalarekin lotutako 850 enpresa baino gehiago biltzen ditu. Urteurrenak aukera eman zuen 1946tik egindako bidea gogoratzeko, baina, batez ere, erakundeak bere hurrengo etapa nola jorratu nahi duen azaltzeko. “Fast Movers” leloak borondate hori laburbiltzen du: aldaketen aurrean azkar mugitzea, lankidetzan jardutea eta talde gisa aurrera egitea.
