CIC bioGUNEren ikerketa batek Siglec-15en egitura eta ekintza-mekanismoa azaltzen ditu, minbiziaren aurkako immunoterapian funtsezkoa izan daitekeen modulatzaile immunea
Lana Nature Communications aldizkarian argitaratu da, eta Siglec-15en potentzial terapeutikoa erabat aprobetxatzen duten sendagai eraginkorrak eskuratzeko hautagaien garapenari atea irekitzen dio
Ezagutza horrek nabarmen lagunduko du immunoterapia berriak eta minbiziaren tratamendurako ikuspegi espezifikoak garatzen
CIC bioGUNEko diziplina anitzeko ikerketa-talde batek, June Ereño Orbea doktorea, Jesús Jiménez Barbero doktorea eta Asis Palazón doktorea buru dituela, guztiak Ikerbasque ikertzaileak, minbiziaren aurkako immunoterapian potentzial handia duen Siglec-15 modulatzaile immunearen egitura eta ekintza-mekanismoa azaldu ditu.
“Structural insights into Siglec-15 reveal glycosylation dependency for its interaction with T cells through integrin CD11b” izeneko artikulu zientifikoa “Nature Communications” aldizkarian argitaratu da, eta Siglec-15en potentzial terapeutikoa aprobetxa dezaketen sendagai eraginkorrak eskuratzeko hautagaiak garatzeko atea irekitzen du.
Duela gutxi, Siglec-15ek interes esanguratsua irabazi du helburu terapeutiko potentzial gisa, bere adierazpen-profil desberdinagatik eta minbiziaren tratamenduan duen potentzialagatik. Hala ere, egitura modu mugatuan ulertzeak eta beste molekula batzuekin nola elkarreragiten duen jakiteak, orain arte, farmakoen garapena oztopatu du.
Ikerketa honetan, CIC bioGUNEko ikerketa-taldeak, Lisboako Nova School of Science and Technology eta Errioxako Unibertsitateko Kimika Departamentuko zientzialariekin lankidetzan, Siglec-15en egitura eta haren epibotoa anti-Siglec-15 antigorputz blokeatzaile batekin lotzeko modua argitu du, X izpien kristalografia erabiliz. Teknika aurreratuen bidez, hala nola asetasun-transferentziaren diferentziaren erresonantzia magnetiko nuklearra (STD-RMN) eta kalkulu konputazionalak, taldeak Siglec-15a hainbat sialoglikanori lotzeko modua argitu du, minbizi mota desberdinekin lotura handia duten karbohidratoak, Tn antigsialil deritzona barne (STn).
Ikerketak agerian utzi du Siglec-15 eta T zelulen arteko lotura, STn adierazpenik ez dutenak, beste sialoglikano batzuen presentziaren araberakoa dela. Gainera, ikerketak CD11b integrina leukozitarioa giza T zeluletako Siglec-15 ligando gisa identifikatu du. Aurkikuntza horiek Siglec-15en egiturazko ezaugarrien ulermen integrala ematen dute, eta glikosilazioak gure immunitate-sistemako T zelulen erantzunak kontrolatzeko duen zeregin erabakigarria nabarmentzen dute.
Ikerketan parte hartu duten María Pia Lenza doktorea, Leire Egia-Mendikute doktorea eta Asier Antoñana Vildosola doktorea pozik agertu dira aurkikuntza horien inplikazioengatik. Uste dute ezagutza horiek asko lagunduko dutela minbizia tratatzeko immunoterapia berriak garatzen.
June Ereño Orbea doktoreak, Jesús Jiménez Barbero doktoreak eta Asis Palazón doktoreak, ikerketaren egile nagusiak, glikosilazioak erantzun immuneak manipulatzeko duen garrantzia nabarmendu dute.
CIC bioGUNEn jarraitzen duen ikerketa honen aurkikuntzek minbiziaren aurkako azken belaunaldiko immunoterapiak diseinatzeko ondorioak dituzte. Horrela, aukera berriak irekitzen dira Siglec-15 edo haren hartzaile glikosilatuak diana terapeutiko gisa adierazteko.
Artikulua Maria Pia Lenzak, Leire Egia-Mendikutek, Asier Antoñana-Vildosolak eta beste batzuek idatzi dute, eta hemen eskura daiteke: https://rdcu.be/deqy7
