CIC energiGUNE laser pultsatuaren erabilera ari da ikertzen egoera solidoko bateria-gelaxkak fabrikatzeko prozesuan
Lana PULSELiON proiektu europarraren barruan dago. Proiektu horretan kontinenteko 16 enpresa eta ikerketa-zentrok hartzen dute parte, eta gaur egin dute hasierako bilera, RISEren (Research Institutes of Sweden) egoitzan, Stockholmen
PULSELiONen helburua, segurua eta eraginkorra izango den eta gailuen energia-dentsitatea eta segurtasuna hobetuko dituen 4b Belaunaldiko egoera solidoko baterietarako fabrikazio-prozesua garatzea da
CIC energiGUNEk, energiaren biltegiratzean erreferentea den, eta baterietan, energia termikoko soluzioetan eta hidrogenoaren teknologietan espezializatuta dagoen eta Basque Research & Technology Alliance-BRTAko kidea den euskal ikerketa-zentroak, laser pultsatuaren teknikaren bitartez bateriak fabrikatzeko teknologia berrien garapena ikertuko du. Lan hori PULSELiON proiektu europarraren barruan dago. Proiektu horren bitartez, egoera solidoko baterien segurtasuna eta energia-dentsitatea hobetzeko eta mota horretako gailuak eskala handian ekoizteko atea irekitzeko produkzio-prozesua garatu nahi da.
“Egoera solidoko elektrolitoek bateria-gelaxken egungo mugak gainditzeko aukera ematen dute, tentsioari eta segurtasunari dagokienez”, gogorarazi du Jokin Rikartek, CIC energiGUNEk proiektuan duen ikertzaile nagusiak. “Hala ere, elektrolito likidoa duten ohiko gailuen alternatiba gisa behin betiko abiarazteko, energia-dentsitatea eta gailuen segurtasuna hobetuko dituen fabrikazio-teknologia garatu behar dugu, eta horretara bideratzen da PULSELiON proiektua”, ziurtatu du.
Alde horretatik, CIC energiGUNEk eta Europako beste 15 erakundek parte hartzen duten PULSELiON proiektuaren helburua, litiozko metalezko anodo batean, sulfurozko elektrolito solido batean eta nikelean aberatsa den NMC katodo batean oinarritzen diren 4b Belaunaldiko egoera solidoko bateriak fabrikatzeko prozesua garatzea da. PULSEDEON proiektuko bazkideek jada garatutako laser pultsatu bidezko deposizio-teknika berritzaile baten bitartez, urrats bakarreko huts-prozesu batean egokitu eta aldatuko da, litiozko metalez, geruza babesleez eta sulfuroz osatutako anodo-osagaien fabrikazio segururako eta eraginkorrerako.
Hasieran, anodo- eta katodo-geruzak eskala txikian garatuko dira, botoi-itxiturako eta geruza bakarreko gelaxkak egiteko, eta, horrela, materialak eta prozesua optimizatuko dira. Ondoren, egoera solidoko gelaxkak prozesu-ibilbide optimizatuen bitartez garatuko dira, eta 10 Ah-ko egoera solidoko baterietara eskalatuko dira, hainbat unitate mihiztatzea barne hartzen duen linea pilotu kontzeptuaren proba baten bitartez. Gainera, digitalizazioa prozesuen modelatzean txertatuko da, eta horrek prozesua modu eraginkorrean optimizatzea ahalbidetuko du.
Garapen horretan guztian, oso presente dago Europar Batasunak eraginkortasun eta errendimendu handiko bateria-eredu bat lortzeko egin duen apustua, 2030erako Europan 30 milioi ibilgailu elektrikoko parkea izateko helburua lortzeko. Ildo horretan, gogorarazi behar dugu egoera solidoko elektrolitoek bateria-gelaxken egungo mugak gainditzeko aukera ematen dutela, tentsioari eta segurtasunari dagokienez –litio-dendritak sortzeko arriskua murriztuz–, eta horrek elektrokimika eta egonkortasun handiagora eramango gaitu.
PULSELiON partzuergoa, proiektuaren liderrak (RISE-Research Institute of Sweden) Stockholmen duen egoitzan bildu da gaur hasierako bilera egiteko, eta BRTA I+Gko Euskal Aliantzaren bi ordezkari (CIC energiGUNE eta Ikerlan) bertan izan dira. CIC energiGUNE PULSELiONen egiten ari den lana “Laborategiko prozesuen eta interfaseen optimizazio” lantaldearen buru izatea da. Horrez gain, “Gelaxka txikien eta handien fabrikazioa” eta “Gelaxka- eta segurtasun-probak” lan-paketeetan parte hartzen du.
