CIC energiGUNEk munduko 5 ikertzaile garrantzitsuenetakoak ditu, Stanfordeko Unibertsitateko rankingaren arabera
Michel Armand irakaslea eta CIC energiGUNEko elektrokimika arloko ohorezko zuzendari zientifikoa Euskadiko ikertzailerik garrantzitsuena da maila guztietan, eta Estatuko garrantzitsuena Energiaren arloan; Elena Palomo, Energia Termikoko Soluzioen Arloko Zuzendaritza Zientifikoko arduraduna eta Ikerbasque Professor, berriz, Euskal Autonomia Erkidegoko ikertzailerik garrantzitsuena da Ingeniaritza Mekanikoaren arloan
CIC energiGUNEko zientzialarien zerrenda hauekin osatu da: Montse Casas-Cabanas, Biltegiratze Elektrokimikoaren Arloko Koordinatzaile Zientifikoa eta Ikerbasque Research Associate; Javier Carrasco, Modelizatu eta Simulazio Konputazionaleko Taldeko burua; eta Yaroslav Grosu, Fenomeno Interfazialen eta Medio Porotsuen Taldeko burua
Elsevierrek eta Standfordeko Unibertsitateak egiten duten “Ranking of World Scientists” zerrendak, mundu osoko 20.564 zentrotako lehen mailako 200.000 zientzialari baino gehiago biltzen ditu
CIC energiGUNEk, energia elektrokimikoaren biltegiratzean, energia termikoaren biltegiratzean eta bihurketan eta hidrogenoaren teknologietan erreferentea den euskal ikerketa-zentroak, mundu osoko bost ikertzaile garrantzitsuenetakoak ditu, Stanford Unibertsitateak eta Elsevier argitaletxe akademikoak egindako “Ranking of the World Scientists” zerrendaren arabera.
Zerrenda duela gutxi argitaratu da, eta 2022an garatutako jarduera zientifikoari buruzko informazioa jasotzen du. Esparru zientifikoan nazioarteko erreferentzia nagusitzat jotzen den argitalpen horren datuen arabera, Michel Armand irakaslea Euskadiko ikertzailerik garrantzitsuena da berriro, adar zientifiko guztiak kontuan hartuta, eta Estatu mailako laugarrena. Energiaren arloan, Armand irakaslea -CIC energiGUNEko elektrokimika arloko ohorezko zuzendari zientifikoa- da Euskadiko eta Estatuko ikertzailerik garrantzitsuena, eta, gainera, hamabigarren lekua betetzen du mundu mailan.
Era berean, Elena Palomo CIC energiGUNEko Biltegiratze Termikoaren Arloko zuzendari zientifikoa, hirugarren urtez jarraian, Ingeniaritza Mekanikoaren eta Garraioaren arloan Euskal Autonomia Erkidegoan eragin handiena duena eta Estatuko seigarrena da.
Energiaren arloan, Michel Armandez gain, Montse Casas-Cabanas zentroko Biltegiratze Elektrokimikoaren Arloko Koordinatzaile Zientifikoa eta Ikerbasque Research Associate ere zerrendan dago, arlo horretan Euskal Autonomia Erkidegoan eragin handiena duten ikertzaileen hamargarren postuan. Fisika Aplikatuaren esparruan ere, CIC energiGUNEk erreferentziazko bi ikerlari ditu: Javier Carrasco Euskal Autonomia Erkidegoan Fisika Kimikoaren arloan eragin handiena duen bosgarren ikertzailea da, eta lurraldeko 60 ikertzaile garrantzitsuenetakoa, adar zientifiko guztiak kontuan hartuta; eta Yarik Grosu, Fenomeno Interfazialen eta Medio Porotsuen taldeko burua Euskadiko 14.a da Fisika Aplikatuaren arloan eragin handiena dutenen artean.
Kaliforniako erakunde ospetsuaren zerrenda argitaratutako ikerketen eraginaren arabera egiten da, hainbat faktore kontuan hartuta, hala nola egilekidetza edo auto-aipamenen ehunekoa, eta indexatutako argitalpen zientifikoen eraginarekin zuzenean lotutako parametro normalizatu batzuen analisi konbinatua ere kontuan hartzen da. Azterlanak profesionalen ibilbide profesional historikoaren ikuspegia ematen du, eta baita aztertutako azken urtean, kasu honetan, 2022an, egindako lan espezifikoarena ere.
Zehazki, zerrenda bi partetan banatuta dago. Alde batetik, 2022ko analisiaren emaitza. Bertan, munduko 210.000 ikertzaile baino gehiago aipatzen dira (20.500 zentrotan baino gehiagotan banatuta), 3.737 estatu mailan (504 zentrotan) eta 164 Euskadi mailan. Beste alde batetik, orain arteko (2022ko amaiera) karrera osoaren analisiaren emaitza. Bertan munduko 200.000 zientzialari baino gehiago izendatzen dira (2.624 zentro baino gehiagotan banatuta), 3.230 Estatu mailan (482 zentrotan) eta 118 ikerlari euskal mailan. Azken kasu horretan ere nabarmentzen da Michel Armanden eta Elena Palomoren karrera zientifikoa. Armand lehen postuan dago Euskadin eragin handiena duen ikertzaile gisa adar guztien artean, bere ibilbide luzeari esker. Palomok, berriz, leku azpimarragarria betetzen du Ingeniaritza Mekanikoko eta Garraioko Top 10ean.
