CIC energiGUNEk Vitoria-Gasteiz Campusean antolatutako TEDS24 ekitaldiak industriako energia termikoaren deskarbonizaziorako estrategia berriak eta aurrerapen teknologikoak ezagutaraziko ditu
“Thermal Energy Decarbonization Summit 2024” ekitaldiak erakundeetako arduradunak, industriako profesionalak eta ideien sortzaileak bilduko ditu Arabako hiriburuan datorren azaroaren 20an, batez ere tenperatura ertain eta altuetan industrian energia termikoa deskarbonizatzeko aukera berrien inguruan
Ekitaldi hau CIC energiGUNE buru duen eta ArcelorMittal, Fivemasa, Enerbasque, LifeCycleEngineering-LCE, SDEA Solutions eta Azterlan-ek parte hartzen duten LIFE HI4S proiektuaren barruan dago. Helburua beroaren eta elektrizitatearen ekoizpen konbinaturako instalazio berritzailea eraikitzea da, arku elektrikoko labe bateko ihes-gasetan dagoen hondakin-berotik abiatuta, energia termikoa biltegiratzeko teknologien bidez energia-kontsumoa murrizteko eta energia-balantzea optimizatzeko
CIC energiGUNEk, energia elektrokimikoaren biltegiratzean eta bihurketan eta energia termikoaren biltegiratzean eta bihurketan erreferentea den euskal ikerketa-zentroak, TEDS24 kongresua egingo du datorren azaroaren 20an Euskadiko Parke Teknologikoaren Gasteiz Campusean. Bertan ideia-sortzaileak, industriako profesionalak eta erakundeetako arduradunak bilduko dira, industriaren deskarbonizazioa bultzatzeko, 2030eko helburuak betetzeko xedez. Ekitaldia CIC energiGUNEk koordinatzen duen eta bere LIFE programaren bidez EBren finantziazioa duen LIFE HI4S proiektuaren garapenaren barruan dago.
“Aukera paregabea da azken aurrerapen teknologikoak ezagutzeko, baita energia termiko industrialaren deskarbonizazioaren esparruan merkatua eta etorkizuneko estrategiak nondik nora joango diren jakiteko ere, batez ere tenperatura ertain eta altuetan”, adierazi du Daniel Bielsa CIC energiGUNEko Teknologia Koordinatzaileak. Jardunaldira joatea doakoa izango da, aldez aurretik izena emanda.
Horrela, euskal zentroak gogorarazi du jardunaldi profesionalaz gain, azaroaren 21ean bertaratutakoek ArcelorMittalen Sestaoko instalazioak bisitatzeko aukera izango dutela. Bertan, beroa eta elektrizitatea batera ekoizteko LIFE HI4S instalazioaren prototipoa eraiki da. Horri esker, labeetako hondar-beroa berrerabilita industria siderurgikoak energia-kontsumoa murriztu dezake.
TEDS24 programak abangoardiako politiken eta teknologien formulazioari buruzko eztabaida-, hitzaldi- eta analisi-mahaiak jasotzen ditu, besteak beste, beroaren elektrifikazioa, eguzki-energia termikoa, energia termikoaren kalitatearen hobekuntza eta hondar-beroaren berreskurapena. Gainera, kasu arrakastatsuak aurkezteko gune bat egongo da, baita CIC energiGUNEren instalazioetara bisita bat ere.
Jardunaldi horren bidez, parte-hartzaileek deskarbonizazioari buruzko ezagutza zuzena lortzeaz gain, eskura dauden tresna eraginkorrenak ezagutu ahal izango dituzte, eta harremanak ezarri ahal izango dituzte bazkide potentzialekin eta soluzioen hornitzaileekin, deskarbonizazio termikoko proiektuen erritmoa bizkortzeko.
CIC energiGUNEk koordinatuta, LIFE HI4S partzuergoak beste sei bazkideren partaidetza du: ArcelorMittal, Fivemasa, Enerbasque, LifeCycleEngineering-LCE, SDEA Solutions eta Azterlan. Oro har, proiektuak ingurumen-inpaktu nabarmenak sortzea aurreikusten du, hala nola altzairutegien CO2 isuriak urtean 9 tona murriztea (siderurgiaren guztizko isurien % 6 izango litzateke), edo azpiproduktuak, zepa beltza, urtean 560.000 tona murriztea (EBn sortutako guztizkoaren % 10-15). Ondorioz, energia-kontsumoa murrizteak urtean 200 M €-ko aurrezkia ekarriko luke emisioetan, eta berreskuratutako energiak % 4,9ko aurrezpena ekar lezake arku elektrikoko labearen kontsumo elektrikoan.
