Elektronika malgu inprimatua misio espazialei pisua galtzen laguntzeko

Teknikerrek Europako Espazio Agentziaren (ESA) proiektu bat gidatzen du, espazioan erabiltzeko inprimatutako egiturazko elektronikaren garapena, fabrikazioa, entsegua eta baliozkotzea ezartzeko

Zirkuitu inprimatuko plakak eta multzo elektronikoak mekanismoetan eta egituretan zuzenean integratzeko gaitasunak, inprimatzeko eta termokonformatzeko teknologiei esker, aukera sorta bat irekitzen du hainbat sektoretan, hala nola etxetresna elektrikoetan edo automobilgintzan, eta sektore horietan autoen instrumentuen panelerako erabilera zabaltzen hasi da, adibidez.

Konponbide berri horiek azkar aldatzen ari dira funtzionalitate elektronikoak edozein tresna edo osagaitan fabrikatzeko eta integratzeko modua, eta horiek dira Europan lehen aldiz espazio-aplikazioetarako probatuko direnak, Tekniker euskal zentro teknologikoak gidatzen duen Europako Espazio Agentziak (ESA) finantzatutako proiektu berri batean.

Printed Structural Electronics (SIPRES) ekimenaren erronka nagusia izango da elektronika malgu, inprimatu eta hibridoaren erabilera garatu, fabrikatu eta baliozkotzea, espazio-esplorazio eta -ikerketako misioek eskatzen dituzten muturreko tenperatura-, huts- eta erradiazio-baldintzetan behar bezala jarduteko gai diren prototipo desberdinekin.

“Proiektu hau berritzailea da, ESAk material malguetan inprimatutako sistema elektronikoen aplikazioarekin esperimentatuko duen lehen aldia markatzen duelako, espazioan erabiltzeko”, azaldu du Borja Pozo Teknikerreko Espazio Sektoreko koordinatzaileak.

“Espazioa bidaltzen duten gailuen eta elementuen pisua funtsezko faktore erabakigarria da misio espazialen arrakastarako. Teknologia horrek, materialaren erabilera eta pisu txikiagoari esker, etorkizuneko misioen kostuak merkatzea eta jasangarriagoak izatea ahalbidetu dezake. Gaitasun elektronikoak osagai eta azalera askotan errazago integratzeko atea irekitzen du, forma edozein dela ere “, gaineratu du adituak.

Prototipoak prest jartzea

Teknikerrek elektronikan, fabrikazioan, gainazalen kimikan eta estaldura-teknologietan duen ezagutzarekin eta esperientziarekin lagunduko du prototipoak prestatzen, sortze-fasetik hasi eta espazio-sektorean sartzetik hurbilago dagoen garapen teknologikora arte.

ALTER TECHNOLOGY eta CT Ingenieros – Cadtech ingeniaritzek ere parte hartuko dute prozesuan, eta material polimerikoen, tinta eta itsasgarri eroaleen eta fabrikazio-prozesuen proba eta balidazioa barne hartuko ditu, eskatutako ingurumen-baldintzekin eta osagai elektroniko espazialekin bateragarriak diren ebazteko.

Gailu eta multzo elektronikoak Teknikerren 3D inprimaketako laborategian inprimatuko dira.

Garatu, testatu eta baliozkotu ondoren, lehen frogatzaile teknologikoak lurraren behe-orbitan ikertzeko (LEO) edo Nazioarteko Espazio Estazioaren (ISS) proben kanpaina egiaztatzeko erabili ohi diren plataforma nanosateliteekin inplementatu daitezke.

Aldi berean, ESAk ezarritako ibilbide-orrian oinarrituta, Ilargirako eta Marterako etorkizuneko misioetarako azken prototipoen aplikazioa kontuan har liteke.

“Teknologia honekin garatu ahal izango diren soluzioen artean hauek daude: rover-entzako haize- eta hezetasun-sentsoreak; Ilargirako erradiazio-, tenperatura- eta fotodetektagailu-sentsoreak; espazio-ontzietako mekanismoetarako indar-sentsoreak, edo orbita baxuko satelite txikientzako eguzki-sistema energetikoak eta termikoak”, gehitu du Teknikerreko adituak.

Konponbide horiek online telemetria gainbegiratzeko aukerak ere zabaltzen dituzte, hau da, datuak denbora errealean urrutitik monitorizatzeko eta transmititzeko.

SIPRES ekimena urrian hasiko da, eta bi urteko iraupena izango du. ESAk finantzatzen du, TDE garapen teknologikoko programaren barruan.

Teknikerrek ESArekin kolaboratu du eta kolaboratzen du hainbat proiekturen bidez, besteak beste, espazio-giroak materialetan dituen ondorioak testatzera edo espazio-misioetarako erregaia sortzeko modu berriak ikertzera bideratuak.