Zientzia eta Teknologia Emakumeen
Euskadiko Parke Teknologikoak Zientzia eta Teknologia Emakumeen Ikuspegitik ekimenaren edizio berri bat egingo du azaroaren 4an, 5ean eta 6an. Espainiako Zientzia eta Teknologia Parkeen Elkarteak (APTE) sustatutako ekimen honen helburua da belaunaldi berrien artean bokazio zientifiko eta teknologikoak sustatzea eta etorkizunerako estrategikoak diren esparruetan emakume ikertzaile eta profesionalen eginkizuna ikusaraztea.
Jardunaldiak Hernani, Vitoria-Gasteiz eta Zamudio/Derio Campusetan egingo dira, eta ikasleak eta gazteak bilduko dituzte, ikerketaren, berrikuntzaren eta garapen teknologikoaren errealitatea hurbiletik ezagutzeko diseinatutako programa batean, gure ekosistemako erreferentziazko profesionalen eskutik. 2026an, ekimenak bederatzigarren edizioa ospatuko du, eta bere ibilbidean 4.500 neska-mutil baino gehiagok parte hartu dute.
Topaketa azaroaren 4an hasiko da Hernani Campusean, Orona Ideo eraikinean, Graphenea eta Multiverse Computing bezalako enpresa eta erakunde liderretako emakume ikertzaileen parte-hartzearekin. Bigarren jardunaldia azaroaren 5ean egingo da Vitoria-Gasteiz Campusean, eta Baigene eta AEGko profesionalek beren esperientziak eta ibilbide profesionalak partekatuko dituzte. Azkenik, azaroaren 6an Zamudio/Derio Campusaren txanda izango da, BC3 eta Sisteplanteko ordezkarien parte-hartzearekin.
Parkeko profesionalek moderatutako elkarrizketa-mahaien bidez, parte-hartzaileek puntako esparruetan garatutako ikerketa- eta berrikuntza-proiektuak bertatik bertara ezagutu ahal izango dituzte, baita STEM diziplinek (Zientzia, Teknologia, Ingeniaritza eta Matematika) eskaintzen dituzten lanbide-aukerak ezagutu ere.
Emakume erreferenteekin egingo diren saio inspiratzaileez gain, programak jarduera parte-hartzaileak ere izango ditu, hala nola biomimetika-tailer bat. Era berean, Vitoria-Gasteiz eta Zamudio/Derio Campusetako jardunaldietan, “Mundua aldatu zuten emakumeak” erakusketa bisitatu ahal izango da, zientziaren eta teknologiaren esparruetako emakume erreferenteen ibilbidea ezagutzeko aukera eskaintzen duen erakusketa.
Ekimen honen bidez, Euskadiko Parke Teknologikoak aukera-berdintasunarekin, emakumeen talentua sustatzearekin eta gazteen artean bokazio zientifiko eta teknologikoak pizten lagunduko duten erreferenteak sortzearekin duen konpromisoa berresten du. Etorkizun berritzaileago, anitzago eta inklusiboago baten aldeko apustua da, ezagutzak eta talentuak mugarik izango ez duten etorkizun baten aldekoa.
