GAIKERek material konposatuak ukipenik gabe monitorizatzeko teknologia berriak garatzen ditu

MOSINCO proiektuak material konposatuen piezak fabrikatzeko eta mantentzeko modua hobetzea ekarriko du, kalitatea, segurtasuna eta trazabilitatea hobeto kontrolatzeko

GAIKER zentro teknologikoa MOSINCO proiektuaren buru da. Proiektu horren helburu nagusia material konposatuak kontakturik gabe monitorizatzea ahalbidetuko duten teknologia berriak garatzea da, fabrikazio-prozesutik hasi eta bizitza baliagarria amaitu arte. Helburua piezen kalitatea, segurtasuna eta trazabilitatea bermatzea da, akatsak, mantentze-kostuak eta hondakinak murriztuz.

Ikerketa honen bidez, autodiagnostikorako gaitasuna duten konposite adimendunen belaunaldi berri baterako atea ireki nahi da, eta horien mantentzea optimizatu, ohiko ikuskapen garestiak saihestuz. Fabrikazio-eraginkortasuna eta piezen egiturazko propietateak hobetu nahi dira, material gutxiago erabiliz. Hori lortzeko, hiru ildo teknologiko garatzen eta integratzen lan egiten da. Lehenik eta behin, deformazioak, tentsioak eta esfortzuak edo tenperatura-aldaketak detektatzeko aukera ematen duten materialetan txertatutako mikrohari magnetikoak. Bigarrenik, airez akoplatutako ultrasoinuak (NLU), akatsak detektatzeko eta materiala fabrikatzean ontzea ebaluatzeko. Eta, azkenik, tinta funtzionalak, kolorez aldatzen direnak tenperaturarekin, eta ontze-prozesua kontrolatzeko edo pieza bakoitza zalantzarik gabe identifikatzeko aukera ematen dutenak. Hiru teknologia horien potentzialtasuna aztertzen da proiektuan, bai banaka, bai haien artean sor daitezkeen sinergiak identifikatuz.