Karbono- eta beira-zuntzei bigarren bizitza bat eskaintzeko prozesu berriak

CIDETEC Surface Engineeringek parte hartzen duen MC4 proiektuak material horietan % 60ko birziklagarritasuna lortzeko eta Europak bere balio-katean duen posizioa indartzeko prozesuak ezarriko ditu

MC4 (Multi-level Circular Process Chain for Carbon and Glass Fibre Composites), CIDETEC Surface Engineering-ek parte hartzen duen proiektu europarra, zirkularitatea karbono- eta beira-zuntzezko konposatuetara hurbiltzeko helburuarekin sortu zen. Material horiek ekoizteko prozesuan, aplikazio tekniko askotan funtsezkoak direnak, arinak direlako eta prestazio handiak eskaintzen dituztelako, produktuaren % 40 ere alferrik galtzen da, eta 15-30 urteko bizitza baliagarriaren ondoren, materialaren % 98 birziklatzeko itxaropenik gabe baztertzen da. Urtero karbono-zuntzezko 110.000 tona osagai konposatu eta beira-zuntzezko 4,5 milioi tona konposatu erabiltzen dira; horregatik, funtsezkoa da sortzen duten ingurumen-inpaktua murrizten duten konponbideak jorratzea.

Ingurumen-kontu horiek alde batera utzi gabe, Europak balio-kate horietan egun duen lehiakortasun-posizioa hobetu behar da, gaur egun atzerriko iturriekiko mendekotasun-maila handiarekin. Karbonoaren eta beira-zuntzaren fabrikazioaren % 80 Europatik kanpo egiten da; aldiz, fabrikazioa erkidegoko mugaren barruan egiten denean, teknologiak sarritan atzerriko herrialdeetakoak izaten dira.

Birziklagarritasun- eta lehiakortasun-irtenbideak eskaintzeko, ikerketa- eta berrikuntza-neurriak eskainiko ditu MC4k, honako hauen bidez:

– Hainbat mailatako prozesu zirkular bat ezartzea karbonozko eta beira-zuntzezko konposatuentzat, industrian epe labur eta luzerako inpaktu baterako garatutako prozesuekin.
– Bi balio-kateen berezitasunetara egokitzen diren prozesu ekonomiko errealistak garatzea.
– Europako industriari material birziklatuen fabrikazio-prozesu patentatuak menderatzeko eta edukitzeko baliabideak eskaintzea.

Zehazki, MC4 proiektuak birziklatze-prozesuen garapena karbono-zuntzerako matrize/zuntz bereizketa kimikoan eta beira-zuntzerako material konposatua zuzenean berrerabiltzeko erretxina mota berri batean oinarrituko du. Ondorioz, eta birziklatutako materialaren kalitate egokiko sailkapena erabilita, MC4k % 60ko birziklatze-tasa lortzeko prozesuak ezarriko ditu, eta birziklatutako materialak hainbat aplikaziotan egoki erabiltzeko aukera bermatuko du.

Bere helburuak lortzeko, MC4k balio-katean katebegi guztiak estaltzen dituzten 15 bazkide biltzen ditu, hala nola prozesuen garatzaileak, materialen ekoizleak edo pieza konposatuak fabrikatzen dituzten azken erabiltzaileak. Trebetasunak eta ezagutzak elkartzeak aukera emango du konposatuentzat prozesu zirkular iraunkor eta bideragarri bat elkarlanean sortzeko. MC4 2025eko martxoan amaituko da.