RESAC-OFF: Hondartzetan itotzeak eragindako heriotzak murrizteko teknologia berria

Tekniker zentro teknologikoak bainulariak denbora errealean automatikoki detektatzeko sistema bat garatu du, adimen artifizialean oinarritua. Soluzioa erresaka-korronte aktiboak identifikatzen dituen gailu batean integratuta dago, eta Alacanteko probintzian frogatzen ari dira kostaldeko segurtasunean laguntzeko tresna gisa

Espainiako itotzeei buruzko azken datuak kezkagarriak dira. 2024an 741 heriotza erregistratu ziren, % 51,8 hondartzetan. Zifra azken hamarkadako bigarren okerrena da, eta % 11,6ko igoera da 2023koarekin alderatuta.

Euskadin, 11 pertsona hil ziren arrazoi horrengatik. Kopuru horrek hobekuntza txiki bat erakusten badu ere, kezkagarria da oraindik ere, bereziki kontuan hartuta heriotza horietako asko hondartzetan gertatzen direla, joan-etorri handiekin eta itsas baldintza aldakorrekin.

Testuinguru horretan, Tekniker zentro teknologikoak, Basque Research and Technology Alliance (BRTA) erakundeko kideak, ezagutza teknologikoa jarri du Eusko Jaurlaritzaren HAZITEK programak finantzatutako RESAC-OFF proiektuaren zerbitzura. Dinycon Sistemas enpresa buru dela, ekimenak adimen artifizialean oinarritutako irtenbide bat garatu du, kostaldeko segurtasuna babesteko eta hobetzeko, zeina baliozkotzen ari baita Benidormeko (Alacant) Mendebaldeko hondartzan.

Itotzeak prebenitzeko orain arte ezarritako estrategia gehienak iragarpen meteorologiko eta ozeanografikoetan edo sorosleen presentzian oinarritzen dira, hondartza bakoitzaren benetako ingurunean ikusmen automatizaturik eta detekzio espezifikorik gabe.

Hala ere, RESAC-OFFek adimen artifizialean (AA) oinarritutako alternatiba bat sartzen du. Alternatiba horrek denbora errealean aztertzen ditu kamerekin hartutako irudiak, eta erresaka-korronte aktiboak eta eremu horietan bainularien presentzia identifikatzen ditu, eta alerta automatikoak aktibatzea ahalbidetzen du, pertsonentzat benetako arriskua dagoenean.

“Buia edo radarren datuetan oinarritutako sistemek ez bezala, gure sistemak bainu-eremuko arriskuaren ikuspegi zuzena ematen du, hondartza bakoitzera eta une bakoitzera egokituta eta denbora errealean jarduteko gaitasunarekin. Horrek abantaila operatibo handia dakar, eta sorosleen lana osa dezakeen alerta-tresna bat», nabarmendu du Aitor Gutiérrez Teknikerreko ikertzaileak.

Detekzioa baldintza txarretan

Proiektuaren esparruan, Teknikerrek funtsezko zeregina bete du, eta konponbidearen oinarri diren adimen artifizialeko ereduen diseinua, entrenamendua eta baliozkotzea gidatu ditu.

Teknologia-zentroko taldea arduratu da uretako bainularien detekzio automatikoko sistema garatzeaz, denbora errealean, baita ikuspen-, olatu- edo argiztapen-baldintza txarretan ere, ikuspen artifizialeko eta ikaskuntza sakoneko tekniken bidez.

Era berean, Teknikerrek teknologia berria bereizten duen beste elementu batean lagundu du: azpiegitura digital konplexurik gabeko hareatzetan ezartzeko gaitasuna, hodeiaren eta etengabeko konektagarritasunaren mende egon gabe. Energiari dagokionez efizientea eta erraz mantentzeko modukoa den arkitektura autonomo horrek hondartza txikietara, isolatuetara edo zaindu gabekoetara, eskalatzea ahalbidetzen du, orain arte ohiko sistema teknologikoen irismenetik kanpo geratzen baitziren.

Azkenik, konponbidearen diseinu modularra eta kostaldeko ingurune desberdinetara egokitzeko gaitasuna alternatiba berritzaile, bideragarri eta eskalagarri gisa kokatzen dute, eredu teorikoetatik harago doana eta modu ukigarrian itotzearen ondoriozko heriotzak murriztera bideratuta dagoena.

«Gure garapen teknologikoak ziurtatzen du detektatutako informazioa berehala iritsiko dela udalek edo larrialdi-zerbitzuek zabaldutako bistaratze-, alerta- edo erabaki-sistemetara», gehitu du Teknikerreko adituak.

Oro har, zentro teknologikoaren lanari esker, RESAC-OFF sistemak modu erabat autonomoan eta eskalagarrian funtziona dezake, kostako segurtasunerako irtenbide errealista, eraginkor eta fidagarria eskainiz.

Teknikerrez gain, proiektuak Visual50, Greenresults eta SPRI Enpresa Garapenerako Euskal Agentziaren laguntza izan du.