TECNALIAk irtenbide berritzaileak garatu ditu Euskadin dauden eraikinen energia-sistema deskarbonizatzeko
Ikerketa eta garapen teknologikoko zentroak jardunaldi bat antolatuko du ekainaren 14ko goizean Kursaalen, berogailu, hozte eta ur bero sanitariorako soluzio horiek azaltzeko. Soluzio horiek bero-ponpetan oinarritzen dira, eta CO2 emisioak murriztea eta faktura energetikoetan aurreztea ahalbidetzen dute
Ekitaldian parte hartuko dute VAILLANT, ECOFOREST, TELUR, RIOS RENOVABLES, ALOKABIDE, Energiaren Euskal Erakundea (EEE), Klimatizazio Ekipoen Fabrikatzaileen Elkartea, Energia Zerbitzuen Enpresen Elkarte Nazionala eta Klimatizazio eta Hozte Elkarte Tekniko Espainiarra
Dauden eraikinen deskarbonizazioa funtsezkoa da neutraltasun klimatikoaren helburu orokorrak lortzeko. Gaur egun, Europako energia-eskariaren % 40aren eta CO2 isurketen % 36aren erantzule dira, batez ere berokuntza, hozte eta ur bero sanitarioko sistemetatik eratorritakoa. Testuinguru horretan, bero-ponpak funtsezko teknologia dira eraikinen bero-horniduran berriztagarriak sartzeko, bereziki in situ elektrizitate berriztagarriaren ekoizpenarekin konbinatuz, adibidez, energia fotovoltaikoaren bidez.
TECNALIA ikerketa eta garapen teknologikoko zentroak Euskadiko eraikinetan beroa eta hotza elektrifikatzeko soluzio berritzaileak aztertuko ditu ekainaren 14ko goizean Kursaalen (9: 30etik 14:00etara).
Ekitaldian honako erakunde hauek hartuko dute parte: VAILLANT, ECOFOREST, TELUR, RIOS RENOVABLES, ALOKABIDE, Energiaren Euskal Erakundea, Klimatizazio Ekipoen Fabrikatzaileen Elkartea, Energia Zerbitzuen Enpresen Elkarte Nazionala eta Klimatizazio eta Hozte Elkarte Tekniko Espainiarra. Gainera, familia bakarreko eraikinetan, etxebizitza-blokeetan eta eraikin berrietan edo birgaitzeetan instalatutako bero-ponpen bidezko soluzio errealak aurkeztuko dituzte. Eta doako jardunaldi ireki batean egingo dute, batez ere bero-ponpen ekipoen fabrikatzaileei, ingeniaritzei, mantentzaile eta sustatzaileei, eragile publiko eta instituzionalei eta elkarteei zuzenduta. Jardunaldi horrek bero-ponpen balio-kate osoa estaliko du, fabrikatzailearengandik hasita, instalaziotik eta mantentze-lanetatik igarota, azken erabiltzailearengana iritsi arte.
TECNALIAk esperientzia handia du eraikinetarako ekipo termikoak diseinatzen eta optimizatzen. Azken urteotan, eraikinen energia-sistema birgaitzeko bero-ponpa deszentralizatuetan oinarritutako soluzio teknologiko bat landu du, % 70-75erainoko energia-frakzio berriztagarria ahalbidetu dezakeena.
