WASTE2H2k plastikoak hidrogeno garbi bihurtzeko Aholku Batzordea sortu du
CIC energiGUNEk, WASTE2H2 proiektu europarraren erakunde koordinatzaileak, ekimen honetarako Aholku Batzorde bat sortuko duela iragarri du. Batzorde hori energiaren, hondakinen balorizazioaren eta ingurumen-kudeaketaren sektoreko erreferentziazko enpresek osatuko dute
WASTE2H2ren helburua hondakin plastikoak balioesteko teknologia bat garatzea da, hondakin horiek hidrogeno garbi eta balio erantsi handiko karbonozko material bihurtzeko zero isuri garbiekin.
“Advisory Board” osatuko duten enpresak Moeve, Nalón Innova, Urbaser eta Thales dira, eta esperientzia emango dute hainbat arlotan, hala nola energia iraunkorrean eta hondakinen kudeaketan, karbonoan oinarritutako berrikuntzan eta potentzia handiko mikrouhinen/RF teknologietan. “Enpresa horien parte-hartzea aurrerapauso erabakigarria da proiektuarentzat, balorizazioko teknologia berritzaileak garatzeaz gain, Europako deskarbonizazioan eta trantsizio energetiko garbian lagunduko baitu”, adierazi du Eduardo J. García-Suárez, IKERBASQUE Research Fellow eta CIC energiGUNEko ikertzaile nagusiak WASTE2H2 proiektuan.
WASTE2H2ren helburu nagusia metodologia disruptibo bat garatzea da, likido ionikoetan oinarritutako sistema katalitiko berritzaileen garapena mikrouhin bidezko irradiazioarekin konbinatzen duena. Horrela, purutasun handiko hidrogeno garbia eta deskarbonizatutako produktu kimiko baliotsuak -karbonozko materialak, hala nola ikatz aktibatua edo karbonozko nanohodiak- gaika ekoizteko atea irekitzen da, lehengai gisa hondakin plastikoak erabiliz. Horrela, energia garbiaren sorrera bultzatzeaz gain, hondakin plastikoek sortutako ingurumen-kutsaduraren arazo larriari modu eraginkorrean heltzen zaio.
