CEGASA Energiak Carlos Freire izendatu du Produktu Garapeneko zuzendari berri
Ingeniaritzan eta baterien teknologian ibilbide sendoa duen Carlos Freirek esperientzia zabala du elektrifikazio- eta mugikortasun-proiektuetan, bereziki itsas sektorean
Bere izendapenak CEGASA Energiaren gaitasun teknikoak indartuko ditu, energia-biltegiratzearen sektore eta aplikazio berrietara dibertsifikatzeko eta nazioartean hedatzeko une estrategikoan
Energia biltegiratzeko soluzioetan Europako erreferente den CEGASA Energiak Carlos Freire Produktu Garapeneko zuzendari berri izendatu du, konpainiaren hazkunderako funtsezko une batean. Nazioarteko hainbat proiektu garatzen ari den eta sektore berrietan sartzen ari den testuinguru honetan, enpresak merkatuko aukerak identifikatzeko, beharretara egokitutako soluzioak garatzeko eta bere ezagutza teknologikoa aplikazio berrietara eramateko gaitasuna indartzen du.
Carlos Freirek ibilbide profesional zabala du ingeniaritzan, baterien teknologian eta elektrifikazioari nahiz mugikortasunari lotutako proiektuen garapenean, bai lurreko bai itsas garraioko eremuetan. Bere esperientziaren artean nabarmentzen da mugikortasun elektrikorako litio-ioizko baterietan espezializatutako enpresa bateko Marine dibisioaren zuzendaritza, bai eta itsas aplikazioetarako energia biltegiratzeko soluzioen aholkularitza ere. Itsas sektoreari buruzko ezagutza hori bereziki garrantzitsua da CEGASA Energíarentzat, bere soluzioen irismena aplikazio eta merkatu berrietara zabaltzen ari baita.
«Energia biltegiratzeak potentzial handia du elektrifikazioa bultzatzeko eta sektore desberdinetan aplikazio berriak garatzeko. Potentzial hori aprobetxatzeko, funtsezkoa da proiektu bakoitzaren beharrak ulertzea eta ingeniaritzatik lan egitea kasu bakoitzera egokitutako soluzio fidagarriak eskaintzeko. Energia biltegiratzearen arloan punta-puntako talde batekin batera garapen horretan parte hartu ahal izatea aukera bikaina da», adierazi du Carlos Freirek, CEGASA Energiako Produktu Garapeneko zuzendariak.
90 urte baino gehiagoko industria-ibilbidea eta ekoizpen-gaitasuna dituen CEGASA Energiak energia biltegiratzeko soluzio integralak garatzen ditu, teknologia propioan oinarrituak eta sektore desberdinen beharretara egokituak. Industria- eta teknologia-gaitasun horrek oinarri sendoa eskaintzen du proiektu berriak sustatzeko eta elektrifikazioaren zein trantsizio energetikoaren erronkei erantzuteko.
«Baterien teknologian duen esperientzia sendoaz gain, itsas sektorearen ezagutza eta ingeniaritza, berrikuntza eta negozioa uztartzen dituen ikuspegi integrala ditu. Carlosek gure hazkundea ulertzeko moduarekin guztiz bat datorren lan egiteko modua ekartzen du: talde teknikoekin elkarlanean aritzea, konfiantza sortzea eta pertsonak zein ezagutza konektatzea. Ziur gaude bere esperientziak eta negozio-ikuspegiak etapa berri honetako erronkak aukera bihurtzen lagunduko digutela», adierazi du Iñigo Atutxak, CEGASA Energiako CEOak.
