CIC energiGUNEk 12 eta 16 urte bitarteko haurrei zuzendutako “Women in Science” azoka zientifikoa egingo du otsailaren 14an Gasteizen
Ekimena, Emakume eta Neska Zientzialarien Nazioarteko Eguna ospatzeko euskal erakunde eta unibertsitateekin batera Euskadiko ikerketa-eragile eta -erakunde nagusiek antolatzen duten “Emakumeak Zientzian” programaren barruan egingo da eta zentroko profesionalek dinamizatutako tailer eta jarduera ludikoak eskainiko ditu
Gainera, Maica Morant CIC energiGUNEko ikertzaileak, Marion Donovan asmatzaile eta erabili eta botatzeko pixoihala asmatzeagatik ezaguna den enpresari estatubatuarrari buruzko hitzaldi-omenaldia eskainiko du otsailaren 11n Europa Kongresu Jauregian izango den “Atzoko eta gaurko emakume zientzialariak” jardunaldian
CIC energiGUNEk, energia elektrokimikoaren biltegiratzean eta bihurketan eta energia termikoaren biltegiratzean eta bihurketan erreferentea den euskal ikerketa-zentroak, Emakume eta Neska Zientzialarien Nazioarteko Eguneko ospakizunekin bat egingo du, 12 eta 16 urte bitarteko haurrei zuzendutako azoka ludiko-zientifikoarekin. Azoka otsailaren 14an izango da, Gasteizko Salburua Gizarte Zentroan, 18:00etatik 20:00etara. Ekimena, Euskadiko ikerketa-eragile eta -erakunde nagusiekin eta instituzio eta unibertsitateekin batera CIC energiGUNEk parte hartzen duen emakumeak zientzian duen rola bultzatzeko eta ikusarazteko “Emakumeak Zientzian” programaren parte da.
“Women in Science 25” azokaren barruan, proiektu zientifikoei lotutako hainbat tailer egingo dira, ikertzaileen ordezkaritza baten parte hartze aktiboarekin eta dinamizazioarekin. Era berean, emakumeek hasiera-hasieratik zientzian eta teknologian egiten duten lana ezagutarazteko hainbat antzerki eta ikus-entzunezko emanaldi eskainiko dira. Horrela, parte hartzen duten umeek zuzenean ezagutu ahal izango dituzte Gasteizko Euskadiko Parke Teknologikotik egunero inguratzen gaituen mundua ulertzen laguntzen duten zientzialariak.
Zientzian, teknologian, ingeniaritzan edo matematikan interesa duen edonork har dezake parte azokan, baina aldez aurretik izena eman behar da “Emakumeak Zientzian” ekimenaren webgunean, esteka honen bidez. Izena ematen duten pertsonentzat, “Women in Science 25” programak “hainbat jardueratan parte hartuz, zientzialariak ezagutuz eta haiei edozein zalantza edo jakin-min zuzenean galdetzeko aukera izanez arratsalde dibertigarria” agintzen du.
“Atzoko eta gaurko emakume zientzialariak” hitzaldia
Azoka zientifikoaz gain, Emakume eta Neska Zientzialarien Nazioarteko Egunarekin eta “Emakumeak Zientzian” ekimenarekin lotutako beste jarduera batzuk ere egingo dira Gasteizen. Esate baterako, Maica Morant CIC energiGUNEko ikertzaile seniorrak parte hartuko duen “Atzoko eta gaurko emakume zientzialariak” hitzaldia.
Ekitaldia otsailaren 11n izango da, Europa Biltzar Jauregiko Barandiaran Aretoan, 18:00etatik 19:00etara, eta historiako emakume zientzialari handienetako bati omenaldia egingo zaio. Maica Morantek, Marion Donovan asmatzaile eta enpresari estatubatuarraren ibilbidea aurkeztuko du. Haren lan nekaezinari esker sortu ziren erabili eta botatzeko pixoihalak, gaur egun ezagutzen ditugun eta erabiltzen jarraitzen ditugun pixoihalak, alegia.
Gasteizko “Emakumeak Zientzian” programaren agenda osatzeko, Le théorème de Marguerite – Margueriteren teorema (Anne Navion, 2024) filma emango da Artium Museoan, otsailaren 13an, 19:00etan. Eta Salburua Gizarte Etxean, azkenik, Euskadiko Parke Teknologikoak CIC energiGUNEko zenbait ikertzaileren lana aipatzen den emakume zientzialariei eta teknologoei buruz antolatutako erakusketaz gozatu ahal izango da.
“Emakumeak Zientzian”, hainbat jardueraren bidez emakumeen lana ikusarazteko ekimena da, erreferente femeninoak sortzeko eta esparru zientifikoan genero berdintasuna lortzea ahalbidetuko duten jardunbideak sustatzeko. Horrela, azpimarratu behar da CIC energiGUNE berdintasuneko erreferentziazko ikerketa zentroetako bat dela, izan ere, duela urte batzuetatik hona parekotasuna dago plantilla osoan, zuzendaritza arloan barne, eta hori mugarria da estatu mailan.
