Emakumeak Zientzianek berdintasunarenaldeko ekintza txiki bakoitzaren ahalmena azpimarratzen du
Festa-giroan hasi da Emakumeak Zientzianen 9. edizioa. Ekintza txiki bakoitzak zientziaren berdintasunaren aldeko bidea nola ireki dezakeen nabarmendu nahi du
Hogeita hamabost euskal erakundek 60 jarduera baino gehiagoko programa zabala antolatu dute Emakumeak Zientzianen 9. edizioan
100 pertsona baino gehiago etorri dira gaur arratsaldean Bilborockera Emakumeak Zientzian ekimenaren 9. edizioari hasiera emateko, “Hazia erein/ Siembra la semilla” lelopean, agerian uzteko nolako gaitasuna duen ekintza txiki bakoitzak zientzian berdintasuna lortzeko bidean. Horrez gain, eraldatze-hazi txiki horien garrantzia gertutik bizi izan duten zenbait zientzialari, irakasle, ikasle, erakundeetako ordezkari eta abarren testigantzak biltzen dituen bideo bat ere aurkeztu dute, eta gonbita egin dute etorkizun parekideago bat eraikitzeko eguneroko ekintzen ahalmenaz hausnartzeko.
Maitena Salinas aktoreak zuzendu du ekitaldia, eta, ondoren, Emakumeak Zientzianen koordinazio-taldeak antzezpen bat egin du. Zientzia-hazia emez ernetzeko prozesua irudikatu dute antzezlanean. Emakume eta neska zientzialarien nazioarteko egunaren hamargarren urteurrenean, Emakumeak Zientziak ekimenak izan duen hazkundea eszenaratu da, 2017an ereindako hazi baten metaforarekin. Erakunde-talde txiki batekin hasi zena loratzen joan da ekosistema sendo bihurtu arte. Bilakaera horrek estereotipoak apurtzeaz gain, nesken eta emakume gazteen bokazio zientifikoak indartzen ditu, eta zientzia berdintasunez eta aniztasunez haziko den etorkizuna bermatzen. “Landatutako hazi bakoitza zientzia inklusiboagoa eta ekitatiboagoa lortzeko urrats bat da. Elkarrekin, aldaketa azkartzen dugu”, diote Emakumeak Zientzianeko antolatzaileek.
Horrez gain, Hazia Erein / Siembra la Semilla kanpainaren bideoa aurkeztu dute, azpimarratuz nola lagundu dezakeen ekintza txiki bakoitzak berdintasuna lortzeko bidean. Besteak beste, zientzialari, irakasle, ikasle eta erakundeetako ordezkari hauek beren esperientzien berri eman dute, eta zientziaren alorrean genero-berdintasunarekin duten konpromisoa balioetsi: Celia Rogero, Materialen Fisika Zentroko zuzendaria (CFM CSIC-UPV/EHU), Itziar Astigarraga, Gurutzetako Unibertsitate Ospitaleko pediatria-zerbitzuko burua eta Biobizkaiako ikertzailea, Garazi Andonegi, Elhuyar Zientzia Unitateko koordinatzailea, Marta Anza, Botikazar BHIko ikasketa-burua, Naia Martin, Botikazar BHIko batxilergoko 2. mailako ikaslea, Alaitz Landaluze, Innobasqueko berrikuntza-politiken koordinatzaile nagusia, eta Miren Elgarresta, Emakundeko zuzendaria.
“Inaugurazio ekitaldi honek hasiera ematen dio programa askotariko eta aberasgarri bati, zeinaren helburua baita emakumeek zientzian duten papera ikustaraztea eta gizarte aberatsago baterantz aurrera egiten jarraitzea”, nabarmendu dute Emakumeak Zientzianeko antolatzaileek.
Emakumeak Zientzian 2025 programa otsailaren 7tik 14rako astean garatuko da. 60 jarduera baino gehiagoko programa zabal bat diseinatu da, EAE osoan zehar, erakusteko kolektibo txikiek eragin eraldatzailea sortzen dutela denboran zehar. “Zientzialari baten lanetik hasi eta neskato batengan pizten den jakin-minaren txinpartaraino, ekarpen bakoitza aldaketa erreal, sakon eta jasangarri bat elikatzen duen hazia da”, gehitu dute Emakumeak Zientziango antolatzaileek.
Jarduera-programa osoa www.emakumeakzientzian.eus webgunean dago. .
Emakumeak Zientzianen 9. edizioan parte hartzen duten 35 erakundeak Euskadiko zientzia eta teknologiaren ehunaren erakusgarri dira: Achucarro, BCMaterials, Materialen Fisika Zentroa (CFM CSIC-UPV/EHU), CIC biomaGUNE, Deustuko Unibertsitatea, UPV/EHU Informatika, UPV/EHU Kimika, Aranzadi Zientzia Elkartea, Basque Artifcial Intelligence Center (BAIC), Basque Centre for Climate Change (BC3), Basque Center for Applied Mathematics (BCAM), Basque Center on Cognition, Brain and Language (BCBL), Bio bizkaia, BioGipuzkoa, Ceit, CIC energiGUNE, CIC nanoGUNE, Cidetec, Donostia International Physics Center (DIPC), Elhuyar, Kutxa Fundazioa, Biofisika Bizkaia Fundazioa, Ikerlan, Ingeniariak-Colegio Oficial de Ingenieros Industriales de Gipuzkoa, Mondragon Goi Eskola Politeknikoa (MEGP), Mubil, Euskadiko Parke Teknologikoa, POLYMAT, Tecnalia, Tecnun, UPV/EHU Ingeniariak, Vicomtech, CIC bioGUNE, ESS Bilbao eta BBD BioPhenix SL-Biobide.
Emakumeak Zientzian 2025ek Bizkaiko Foru Aldundiaren, Gipuzkoako Foru Aldundiaren, Arabako Foru Aldundiaren, Donostiako Sustapenaren, Bilbao Ekintzaren, Salto Systemsen, Basque Research & Technology Alliance (BRTA) aliantzaren eta Ikerbasquen laguntza nabarmena du, baita honako entitate eta erakunde hauen laguntza ere: Ikerketa Zientifikoen Kontseilu Nagusia (CSIC), Zientzia eta Teknologiaren Espainiako Fundazioa (FECYT), Estatuko Ikerketa Agentzia —ekimenarekin bat egin duten Severo Ochoa eta María de Maeztu zentroen bidez—, Euskadiko Filmategia eta Donostiako Zinemaldia, Biook, Skills4Science, Laboratorium Bergara, Emakunde, Lemniksata eta UPV/EHUren Berdintasunerako Zuzendaritza.
