Euskadiko Parke Teknologikoak etorkizuneko zientzia- eta teknologia-parkeei buruz duen ikuspegia partekatu du Reusen
Euskadiko Parke Teknologikoak APTEren Nazioarteko XXIV. Konferentzian parte hartu du, Eguskideak Energia Komunitateagatik accesit bat jaso du eta berrikuntza-espazioen eredu berriei buruzko hausnarketan duen zeregina indartu du
APTEren Nazioarteko XXIV. Konferentziak, azaroaren 9an eta 10ean Reusen egindakoak, estatuko eta nazioarteko berrikuntza-ekosistemako 40 ordezkari bildu zituen, zientzia- eta teknologia-parkeen bilakaerari eta garapen ekonomiko, teknologiko eta lurralde-garapenaren eragile gisa duten zereginari buruz hausnartzeko.
«Etorkizuneko Zientzia eta Teknologia Parkeak» lelopean, ekosistema horien erronkekin zuzenean lotutako gaiak jorratu ziren topaketan: jasangarritasuna eta energia-kudeaketa, gorabidean dauden sektoreak, lankidetza publiko-pribatua, ekintzailetza eta talentua.
Itziar Epalza Urkiaga, Euskadiko Parke Teknologikoko zuzendari nagusia, etorkizuneko parkeak nolakoak izango diren aztertzeko mahai-inguruan aritu zen, eta hausnarketak eta esperientziak partekatu zituen Italiako AREA Science Parkeko eta Salamancako Parke Zientifikoko ordezkariekin.
Ondorio nagusien artean, nabarmendu zen parke teknologikoek energia-kontsumitzaile izatetik energia ekoizteko, biltegiratzeko eta partekatzeko gai diren ereduetara eboluzionatu behar dutela. Era berean, azpimarratu zen gorabidean dauden sektoreetako espezializazioak lurralde bakoitzaren ezaugarri eta beharrei erantzun behar diela, haren gaitasun zientifiko eta teknologikoak baliatuz lurraldearen eraldaketan laguntzeko.
Hausnarketa hori zuzenean lotzen da Parke bere Campusetan garatzen ari den ekimenekin. Konferentzian, Zamudio/Derio Campuseko Eguskideak Energia Komunitateak APTEren Zientzia eta Teknologia Parkeetako Jardunbide Egokienaren 2026ko XIII. Sarietako accesitetako bat jaso zuen.
Konferentziak, halaber, topaketan egindako ariketa kolektibo baten emaitza den «Etorkizuneko Zientzia eta Teknologia Parkeen aldeko Reuseko Manifestua» aurkezteko ere balio izan zuen. Dokumentuak bost konpromiso nagusi ezartzen ditu: naturarekin batera berritzea, eta ez haren aurka; berrikuntzaren hirietan bizitzea eta lan egitea; hazteko konektatzea; neurrira egindako prestakuntza eskaintzea; eta parkeek gizartearentzat garrantzia izatea lortzea.
Topaketak, gainera, komunikabideek zientziaren, teknologiaren eta berrikuntzaren zabalkundean duten zeregina balioesteko aukera eman zuen, eta Estrategia Empresarial hedabideari aitortza egin zitzaion.
Nazioarteko XXIV. Konferentzia amaiera-ekitaldi batekin bukatu zen. Bertan, Itziar Epalza Urkiagak APTEko lehen presidenteorde gisa parte hartu zuen, Josep Baiges Reuseko Udaleko Sustapen Ekonomiko, Berrikuntza eta Ezagutza zinegotzi eta REDESSAko kontseilari delegatuarekin batera.
