Klima aldaketaren euskal zientzia presente egongo da COP31n

Basque Centre for Climate Change (BC3) ikerketa-zentroak erresilientzia klimatikoari buruzko ezagutza transdiziplinarra eramango du azaroaren 9tik 20ra Turkian egingo den goi-bilerara

María José Sanz zuzendari zientifiko eta Ikerbasque ikertzailea buru duen ordezkaritzak bidezko trantsizio klimatikorako funtsezko gaiak landuko ditu; besteak beste, gizarte-desberdintasunak murrizten dituen deskarbonizazioa eta krisi klimatikoaren aurkako babes finantzario publiko-pribatua

Agendaren barruan, JPI Klimak bultzatutako Europako klima arautzeko korronte atlantikoa ahultzen ari dela ohartarazten duen txosten bat aurkeztuko dute

Basque Centre for Climate Change (BC3) ikerketa-zentroak protagonismo nabarmena izango du NBEren Aldaketa Klimatikoari buruzko 31. Konferentzian (COP31), azaroaren 9tik 20ra Antalya hirian (Turkia). María José Sanz zuzendari zientifiko eta Ikerbasque ikertzaileak gidatutako ordezkaritzak zentroak erresilientzia klimatikoan duen ezagutza transdiziplinarra partekatuko du zenbait ekitaldi ofizialetan.

Agendaren ardatz nagusietako bat Nazio Batuen pabiloi urdinean izango da, azaroaren 10ean; bertan, BC3k, Climate Alliance-rekin batera, «Just Transition: Empowering Local Governments and Communities» izeneko ekitaldi ofiziala antolatu du. Saioak aztertuko du nola bideratu laguntza teknikoa eta ekonomikoa tokiko administrazioetara, deskarbonizazioak gizarte-desberdintasunak murritz ditzan.

Mikel Jauregi Letemendia, Eusko Jaurlaritzako Industria, Trantsizio Energetiko eta Jasangarritasuneko sailburuak jardunaldian parte hartuko du euskal politika publikoen esperientzia azaltzeko Europako udaletako ordezkariekin batera.

Tokiko dimentsioa azaroaren 12an indartuko da, «Cities in Action: Pathways to Just Climate Adaptation» izeneko panelean, uholdeen edo bero-boladen antzeko fenomenoen aurrean hiri-soluzioak ardatz hartuta, Madril, Çankaya edo Bartzelona bezalako hirietan izandako esperientzia praktikoetatik abiatuta.

“BC3n tresna metodologikoak eta froga enpirikoak garatzen ditugu, agerian uzteko nazioarteko klima-erabakiak eraginkorrak eta bidezkoak izango direla soilik tokiko komunitateen eta udalerrien errealitateei erantzuna ematen dietenean”, nabarmendu du María José Sanzek.