Oscar Millet ikertzailea saritu du Espainiako Kimikako Errege Elkarteak
CIC bioGUNEko ikertzaileak RSEQren 2025eko Ikerkuntza Bikaintasunaren Saria jaso du bere ibilbide nabarmenagatik
Gaixotasun arraroak aztertzeko ekimen garrantzitsuak eta aurrerapenak bultzatu ditu
140 argitalpen baino gehiago eta sari ugari jaso ditu, eta bere lan zientifikoak eragin nabarmena izan du nazioartean
Óscar Millet doktoreak, CIC bioGUNEko Doitasun eta Metabolismo Medikuntzako taldeko ikertzaile nagusiak eta CIBERehd sareko kideak, Espainiako Kimikako Errege Elkarteak (RSEQ) ematen duen 2025eko Ikerkuntza Bikaintasunaren Saria jaso du.
Sari honek, RSEQren Ohiko Batzar Orokorraren azken bileran berretsia, biomedikuntzaren arloan egindako ibilbide eta ekarpen zientifiko nabarmena aitortzen du.
2006an CIC bioGUNEn (BRTAko kidea) sartu zenetik, Millet doktoreak funtsezko eginkizuna bete du zentroaren hazkundean, eta ekimen estrategikoak bultzatu ditu, hala nola Erresonantzia Magnetiko Nuklearreko Plataforma (EMN) sortzea eta diseinatzea, gaur egun azterketa biomolekularrerako nazioarteko erreferentziazko azpiegitura baita.
Columbia, Lausana eta Torontoko unibertsitateetan egindako egonaldiak barne hartzen dituen prestakuntza zientifiko sendoarekin, Millet doktoreak proteinen eta metabolitoen analisian zentratu du bere ikerketa-jarduera, gaixotasun arraroei ikuspegi translazional batekin helduz.
Bere lorpenen artean aipagarria da ziklopiroxa sortzetiko porfiria eritropoietikorako tratamendu potentzial gisa identifikatzea, gaur egun AEBetan saiakuntza klinikoko II. fasean dagoena, eta EMAk eta FDAk zurtz gisa onartua.
Gainera, bere taldeak jaioberrien eta biztanleen baheketa-tresnak garatzen lan egiten du metabolomikako tekniken bidez, gaixotasun arraroekin eta sindrome metabolikoarekin lotutako biomarkatzaileak goiz detektatzen lagunduz H2020 eta National Institutes of Health (NIH) ekimenek finantzatutako proiektuetan.
140 argitalpen zientifiko baino gehiagoren egilea eta 18 doktoretza-tesiren zuzendaria, Millet doktoreak jarduera bizia du erakundeen eta zientziaren arteko lankidetzaren esparruan. Gaur egun, Estatuko Ikerketa Agentziaren (EIB) ebaluazio-paneleko kide da, Biomedikuntzaren arloan.
Bere ibilbidean zehar, hainbat sari jaso ditu, besteak beste, RSEQeko Ikertzaile Gazteen Saria (2004), RMNko Talde Espezializatuaren saria (GERMN, 2020) eta Alemaniako Kimika Elkartearen Elhuyar-Goldschmidt Saria (GDCh, 2022).
