TECNALIAk laborategi aitzindaria jarri du martxan sentsore kuantikoak diseinatu eta fabrikatzeko
Europan erreferente den Quantum Lab azpiegiturak sentsore kuantikoak sortuko ditu diamante sintetikoetan oinarritutako teknologia batetik abiatuta
Sentsore kuantikoak dira osasun-arloan aplikazio berriak aurrera egiteko giltza, hala nola farmakoak garatzeko, edo industriarako, material berriak diseinatuta
Laborategia Euskadiko Parke Teknologikoko Zamudio/Derio Campusean dago, eta sentsoreak sortzeko eta fabrikatzeko prozesu osoa bete ahal izateko lau eremu ditu: materiala sortzetik hasi eta gailuen prototipoak prestatzeraino
TECNALIA ikerketa eta garapen teknologikoko zentroak sentsore kuantikoak sortzeko laborategi aitzindaria garatu du. Europan erreferentziazko azpiegitura da, diamante sintetikoetan oinarritutako teknologia oinarri hartuta sentsore kuantikoak diseinatu eta fabrikatzeko gai dena. Sentsore kuantiko horiek izango dira osasun-arloan aplikazio berriak aurrera egiteko giltza, hala nola farmakoak garatzeko edo industriarako, material berriak diseinatuta.
Euskadiko Parke Teknologikoko Zamudio/Derio Campusean dagoen Quantum Lab laborategiaren inaugurazioa Bizkaiko diputatu nagusi Elixabete Etxanobek, Eusko Jaurlaritzako Industria, Trantsizio Energetiko eta Jasangarritasuneko sailburu Mikel Jauregik, TECNALIAko zuzendari nagusi Jesús Valerok eta TECNALIAko zuzendari digital Joseba Lakak egin dute.
Bizkaiko Diputatu Nagusi Elixabete Etxanobek nabarmendu duenez, “laborategi hau Bizkaia Quantum Advanced Industries, Biqain gure estrategiaren funtsezko zatia da, kuantika industriara transferitzea azkartzea bilatzen baitu.
Bestalde, Mikel Jauregi Eusko Jaurlaritzako Industria, Trantsizio Energetiko eta Jasangarritasun sailburuak azpimarratu duenez, inaugurazio honek “ikerketa, industria eta erakundeak elkarlanean ari direnean, Euskadi etorkizunerako urrats erabakigarriak emateko gai dela erakusten du”. Era berean, adierazi duenez, “Tecnaliaren sentsore kuantikoen laborategi honek gure Industria Planaren lehentasunetako bati forma ematea dakar: bikaintasun-zientzia produkzio-gaitasunetan eta industria-aukera errealetan bilakatzea Euskadin”. Horri dagokionez, Jauregik azpimarratu du Euskadi 2030 Industria Planean kuantika eta adimen artifiziala ardatz estrategikoak direla. “Palankak dira gure lehiakortasuna indartzeko, gure subiranotasun teknologikoa ziurtatzeko eta Euskadi industria-berrikuntzaren mugan jartzeko”.
Enpresen lehiakortasuna bultzatzeko proiektuak
Teknologia kuantikoen potentzial guztia garatzeko, TECNALIAk Quantum Lab garatu du. Laborategi horrek 5 milioi euro baino gehiagoko inbertsioa behar izan du, eta teknologia horretan orain arte landu duen ekipamenduaren osagarri da. Azpiegiturak lau eremu ditu sentsore kuantikoak diseinatzeko eta sortzeko prozesu osoa barne hartzeko.
