CIC bioGUNEko ikertzaile Ana Ruiz Sáenz saritu dute bularreko minbizi metastasikoaren tratamendu pertsonalizatua hobetzeko proiektu batengatik

Albisteak, Bizkaia

CIC bioGUNEk koordinatutako ekimenak AstraZeneca Fundazioaren Ikertzaile Gazteen Sarien hamargarren edizioan jaso du aitortza, Onkologia, Doitasunezko Medikuntza eta Immuno-onkologia kategorian

Ikerketak aztertuko du glikosilazio diferentzialaren ereduek nola eragiten duten trastuzumab deruxtecan tratamenduaren eraginkortasunean bularreko minbizi metastasikoa duten pazienteengan

CIC bioGUNEko ikertzaile Ana Ruiz Sáenz, BRTAko kidea den zentroko ikertzailea, AstraZeneca Fundazioaren Ikertzaile Gazteen Sarien hamargarren edizioan saritu dute, bularreko minbizi metastasikoan ardaztutako ikerketa-proiektu batengatik. Ekimenak Onkologia, Doitasunezko Medikuntza eta Immuno-onkologia kategorian jaso du saria, eta 225.000 euroko finantzaketa izango du.

«Glicosilación diferencial en cáncer de mama metastásico como modulador de la eficacia del trastuzumab deruxtecan» izeneko proiektuaren helburua da aztertzea glikosilazio diferentzialaren ereduek nola eragiten duten eta nola modulatzen duten trastuzumab deruxtecan tratamenduaren eraginkortasuna bularreko minbizi metastasikoan. Horrela, paziente horien erantzun terapeutiko pertsonalizatua optimizatzeko bide berriak ireki nahi dira.

Ikerketa Ana Ruiz Sáenzek koordinatzen du. Ikerbasque ikertzailea eta CIC bioGUNEko Minbiziaren Terapiekiko Erresistentzia taldeko burua da. Proiektuan, gainera, Toni Celià-Terrassak (Hospital del Mar Research Institute, Katalunia) eta Natalia Reglero Realek (Severo Ochoa Biologia Molekularreko Zentroa, CBMSO, CSIC-UAM, Madrilgo Erkidegoa) parte hartzen dute. Era berean, Con Cáncer Y Con Metas pazienteen elkartearen babesa du ekimenak.

Ikerketa biomediko kolaboratiboaren aintzatespena

Ana Ruiz Sáenzek zuzendutako proiektua AstraZeneca Fundazioaren Ikertzaile Gazteen Sarien hamargarren edizioan saritutako lau ikerketetako bat da. Sari horien helburua da autonomia-erkidego desberdinetako zientzialari gazteen taldeen arteko ikerketa sustatzea, sarean garatutako proiektuen bidez, herritarrengana transferi daitezkeen emaitzak lortzeko.

Sariek lau proiektu aitortu dituzte honako arlo hauetan: Kardiobaskularra, Giltzurruna eta Metabolismoa; Onkologia, Doitasunezko Medikuntza eta Immuno-onkologia; Arnas Aparatua eta Immunologia; eta Gaixotasun Infekziosoak eta Immunizazioaren bidez Prebeni daitezkeen Gaixotasunak. Proiektu bakoitzak 225.000 euroko dirulaguntza jasoko du autonomia-erkidego desberdinetako zentroen arteko sareko ikerketa kliniko eta translazionalak garatzeko.

«Zientzia konpromisoz idazten da» lelopean egin da hamargarren edizio hau, AstraZeneca Fundazioaren 25. urteurrenarekin bat eginez. Parte-hartze errekorra izan du: 51 proiektu aurkeztu dira, eta 16 autonomia-erkidegotako 189 ikerketa-taldek hartu dute parte. Proposamenen % 70 baino gehiago emakumeek zuzendu dituzte.

Hautagaitzak Carlos III.a Osasun Institutuak (ISCIII) ebaluatu ditu, ebaluazio-prozesuaren zorroztasuna eta independentzia bermatzeko ardura duen erakundeak.

Hamar edizioetan zehar, AstraZeneca Fundazioak 5,2 milioi euro bideratu ditu sari hauetara, 100 ikertzaile gazte baino gehiagori bultzada emanez eta Espainia osoko ia 700 ikerketa-talde mobilizatuz.

Partekatu

Beste berri batzuk