CIC energiGUNEk aurrera egin du errendimendu handiko ion-litiozko baterien hurrengo belaunaldirako gelifikatutako gelaxken diseinuan
Euskal zentroaren lana NEXTCELL Europako Proiektuaren barruan dago. Kontinenteko 16 erakunde eta enpresekin batera parte hartzen du proiektuan, dentsitate energetiko handia eta funtzionamendu bikaina eskainiko dituen gelaxka erabat gelifikatua lortzeko helburuarekin.
CIC energiGUNEk gidatuko du gelaxkak diseinatzeko eta fabrikatzeko lana, eta horien karakterizazio elektrokimikoan hartuko du parte, ion-litiozko baterien teknologia berri horren zahartze-mekanismo nagusiak identifikatzeko eta arintzeko.
CIC energiGUNE, energiaren biltegiratzean erreferentea den, eta baterietan, energia termikoko soluzioetan eta hidrogenoaren teknologietan espezializatuta dagoen eta Basque Research & Technology Alliance-BRTAko kidea den euskal ikerketa-zentroa, ion-litiozko bateria merkeagoak, seguruagoak eta jasangarriagoak fabrikatzea ahalbidetuko duen elektrolitoa “gelifikatzeko” sistema berritzaile baten aplikazioan oinarritutako bateriako gelaxka berri baten diseinuan ari da lanean. Garapen hori NEXTCELL proiektu europarraren parte da. EBk finantzatzen du Horizonte Europa programaren bitartez, eta euskal zentroak kontinenteko beste 16 enpresa eta erakunderekin batera hartzen du parte bertan.
CIC energiGUNEko proiektuaren arduradunek nabarmendu dutenez, ikerketa honek, litio ioien baterietan kobalto katodo librea eta gel polimerikoak elektrolito gisa erabiliko dituen oso teknologia berritzailea praktikan jartzea ahalbidetuko du, merkatuan aplikazio askotarako teknologia liderra, hain zuzen ere. Horiek garatzean, energia-dentsitate handiari esker jarduketa bikaina bermatuz egungo teknologiek baino tentsio handiagoak ere lor ditzaketen gaitasun handiko ion-litiozko baterien belaunaldi berria sortuko da.
NEXTCELLek, elektrodo porotsu solidoz eta elektrolito likidoz betetako egungo gelaxken eredua gainditzean oinarritutako gelifikatutako gelaxken kontzeptu berritzailea proposatzen du. Horretarako, gelaxkako osagai nagusien gelifikazioa landuko da, materialetan hainbat berrikuntza diseinatuz eta integratuz. Alde batetik, elektrodoen gelifikazioan aurrera egingo da eta, bestetik, bereizgailuan egingo da lan, tentsio handiko gel-elektrolito egonkor batekin konbinatzean gelifikatutako gelaxkaren kontzeptu osoa lortu ahal izateko.
Proiektuko kideek aurreikusi bezala, NEXTCELLek abangoardiako gelaxkak emango dizkio Europako merkatuari, eta, horrez gain, gaur egun ion-litiozko baterien teknologia merkatuan gehiago sartzea zailtzen duten funtsezko hiru alderditan ere eragina izango du: kostuak, segurtasuna eta jasangarritasuna.
Zehazki, NEXTCELLek garatutako teknologiak fabrikazio-prozesuak optimizatuko ditu, etorkizuneko lantegien kapital-gastuak eta gastu operatiboak murriztuz, izan ere, elektrolitoak betetzeko etapan disolbagarri kutsatzaileak lurruntzea saihestuko du. Energia-kontsumoa %50 inguru murriztuko dela ere bermatuko du. Gainera, berez seguruak diren gelaxkak sortuko dira, gelaxkek ez dutelako irakite-puntu baxuko osagairik elektrodoetan eta bereizgailuan.
NEXTCELLen barruan, CIC energiGUNEk gidatuko du gelaxken diseinuari eta fabrikazioari buruzko laneko paketea, eta gelaxken karakterizazio elektrokimikoan hartuko du parte, zahartze-mekanismo nagusiak identifikatzeko eta arintzeko helburuarekin. Horrela, euskal etxeak kobaltorik gabeko bateriak sortzera bideratutako CoFBAT proiektuaren barruan norabide horretan hasitako lanarekin jarraituko du.
FEV Europe buru dela, hauek osatzen dute NEXTCELL: CIC energiGUNE, ABEE, Solvay, Nanomakers, Universitat Politècnica de València, Politecnico di Torino, Sintef, Inegi, Frantziako energia atomikorako eta energia berriztagarrietarako komisariotza (CEA), Varta Innovation, FIAT ikerketa-zentroa (CRF), Nanocyl, Univerza v Ljublani, Sustainable Innovations eta Technische Hochschule Ingolstadt.
