Eraldaketa Digitalerako Laguntzak: Babestu zure enpresa zibererasoetatik Zibersegurtasun Industrialeko dirulaguntza berriei esker
Maiatzaren 19an irekiko den Zibersegurtasun Industriala laguntza-programaren edizio berriak 14 milioi euroko aurrekontua izango du. Zibererasoen aurka indartu nahi duten Euskadiko industria-enpresek eta lotutako zerbitzu-enpresek 2026ko azaroaren 23ra arte aurkeztu ahal izango dituzte eskaerak
Programa, aurten, Euskadiko industria-enpresei eta lotutako zerbitzuen enpresei zuzenduta dago, enpresa horien tamaina edozein dela ere
Ba al zenekien zibererasoak mehatxu handienetakoak direla euskal industriarentzat? Eraso horiek galera ekonomiko larriak eragin ditzakete, eta zure bezeroen ospea eta konfiantza kaltetu. Horregatik, funtsezkoa da zure informazioa eta zure sistemak zibersegurtasun-neurri onenekin babestea.
Hori lortzen laguntzeko, SPRIk Zibersegurtasun Industriala 2026 programa abiarazi du, euskal enpresa industrialen segurtasun informatikoa hobetzeko diru-laguntzak eta aholkularitza pertsonalizatua eskaintzen dituena. Programa honekin, zure egungo egoera aztertu eta zure beharretara egokitutako ekintza-plana proposatuko dizuten adituak izango dituzu. Horrela, zibererasoak prebenitu eta haiei erantzun ahal izango diezu, eta zure negozioaren lehiakortasuna bermatu.
Programak, gainera, indartu egiten du zibersegurtasunean onartutako estandarrak, zuzentarauak eta esparruak betetzeko joera, hala nola ISO 27001, ENS, TISAX, IEC 62443, NIS2 edo CRA, gero eta erabakigarriagoak baitira bezeroak, merkatuak eta balio-kateak eskuratzeko.
Berritasun aipagarri gisa, produktuaren zibersegurtasun-proiektuei ekiteko aukera ere ematen du laguntzak, hasi diseinu segurutik eta kodearen berrikuspenetik eta zifratzeraino, ahulezien kudeaketaraino eta produktu industrialen ebaluazio edo ziurtagirietaraino.
Zibersegurtasun Industrialeko Programak itzuli beharrik gabeko diru-laguntzak eskaintzen ditu, 100.000 €-ra arte enpresa bakoitzeko, gastu hautagarrien % 60ra arteko laguntza-intentsitatearekin. Aprobetxatu aukera hau zure enpresa arrisku zibernetikoetatik babesteko!
