Eraldaketa energetikoa eta zibersegurtasuna Mobility Lab-en Patronatura iritsi dira Basquevolt eta Eurocybcar enpresen eskutik
Vitoria-Gasteiz Araba Mobility Lab Fundazioak sektore pribatuaren parte-hartzea handitzen jarraitzen du bere Patronatuan, Basquevolt eta Eurocybcar erakundeak bertara batu baitira. Michelin eta Kapsch TrafficCom berriki sartu ondoren, Fundazioak erreferentziazko erakundeak gehitzen jarraitzen du, mugikortasunaren etorkizunerako estrategikoak diren esparruetan ezagutza, teknologia eta esperientzia eskaintzen dituztenak.
Oraingo honetan, erakunde berrien etorrerak sektorearen eraldaketarako funtsezkoak diren bi arlo indartzen ditu: energia biltegiratzeko teknologia aurreratuen garapena eta ibilgailuei/mugikortasun konektatuari aplikatutako zibersegurtasuna. Bi elementu horiek funtsezkoak dira mugikortasun jasangarriagoa, eraginkorragoa eta seguruagoa eraikitzeko.
Basquevolt eta Eurocybcar erakundeak sartuta, Mobility Labek bere Patronatuan dauden gaitasunak zabaltzen ditu eta berrikuntza-, esperimentazio- eta baliozkotze teknologikoko proiektuak bultzatzeko ahalmena indartzen du. Bi erakundeek ikuspegi osagarriak eskaintzen dituzte datozen urteetan mugikortasunak izango dituen erronka nagusietako batzuei buruz, bateria berrien garapenetik hasi eta zibersegurtasuna ibilgailu konektatu/autonomoetan eta gero eta konektatuago dauden inguruneetako mugikortasun-azpiegituretan integratzeraino.
Basquevolt eta Eurocybcar: energia eta segurtasuna mugikortasun berrirako
Basquevolt Euskadin energia biltegiratzearen esparruan bultzatutako industria- eta teknologia-ekimen garrantzitsuenetako bat da. Konpainiak belaunaldi berriko egoera solidoko bateriak garatzen dihardu. Teknologia horrek mugikortasun elektrikorako funtsezkoak diren hainbat alderdi hobetzea du helburu, hala nola autonomia, segurtasuna, jasangarritasuna eta kargatze-denborak. Patronatuan sartzeak Mobility Laben ezagutza eta gaitasunak indartzea ahalbidetuko du, garraioaren sektorea eraldatzeko potentzial handienetakoa duen esparruetako batean.
Bestalde, Eurocybcar, Azucena Hernández sortzaile eta CEOak zuzendua, CyberMovilidad arloan aitzindaria den enpresa da, eta Mugikortasunaren ekosistemaren zibersegurtasun-maila ebaluatu eta ziurtatzen du: ibilgailuak –autoak, kamioiak, autobusak, furgonetak, motozikletak, bizikleta elektrikoak…–, Flotak Kudeatzeko Sistemak, webguneak/aplikazioak, Mugikortasun Azpiegiturak eta CSMS sistemak. Eurocybcar berezi egiten duena teknologia propioa garatu izana da.
