ICCATek euskal tretzaontzi bat saritu du, marrazoen kudeaketarako datuak emateagatik
AZTIk markatutako marrazo urdin bat berriz harrapatu izanaren berri emateagatik saritu dute ontzia ICCATen urteko zozketan. Ekimen horrek arrantza-sektorearen eta zientziaren arteko lankidetza sustatzen du
AZTIk flotarekin lan egiten du marrazoen joan-etorriak hobeto ezagutzeko eta haien kudeaketaren oinarri den aholkularitza zientifikorako informazioa emateko
Markatutako marrazoak berriz harrapatu direla jakinarazteak haien joan-etorriak ezagutzen eta haien kudeaketari buruzko erabakiak oinarritzen laguntzen du
Atlantikoko Atuna Kontserbatzeko Nazioarteko Batzordeak (ICCAT) Arlanpi euskal tretzaontzia saritu du, berreskuratutako marken urteko zozketako marrazoen kategorian. Ondarroa portu nagusi duen ontziak AZTIk markatutako marrazo urdin bat berriz harrapatu zuela jakinarazteagatik jaso du saria. Kasuak agerian uzten du eskifaien eta ikerketa-taldeen arteko lankidetzaren balioa: berreskuratutako marka batek espezie baten joan-etorriei eta arrantzarekin duen elkarrekintzari buruzko informazioa ematen du.
Zozketa horren bidez, ICCATek arrantza-sektorearen parte-hartzea sustatzen du, aholkularitza zientifikorako eta itsas baliabideen nazioarteko kudeaketarako datuak biltzeko. Ekimenak indartu egiten du ozeanoko eremu zabaletan mugitzen diren espezieak aztertzeko beharrezkoa den lankidetza; izan ere, haien jarraipena egiteko, hainbat flotaren eta ikerketa-talderen behaketak bildu behar dira.
Marrazo urdina (Prionace glauca) 150 zentimetroko luzera osoa zuen eme bat zen. AZTIk 2024ko uztailaren 30ean markatu zuen, Hondarribia pareko ezpondan, plataforma kontinentalaren ertzean, Blueshark proiektuaren barruan. Hilabete geroago, 2024ko abuztuaren 31n, Bermeo parean harrapatu zuten berriz. Marka berreskuratu zela jakinarazteari esker, bi kokalekuak lotu eta alearen joan-etorriak aztertzeko beste datu bat lortu ahal izan zen.
Arrantzari buruzko erabakiak hartzen laguntzen duten datuak
Markaketaren balio zientifikoa behaketak metatu ahala handitzen da. Aleak berriz harrapatzen direneko datek eta kokalekuek, markatzean jasotako datuekin batera, marrazoek zer eremu erabiltzen dituzten eta haien banaketa nola aldatzen den aztertzen laguntzen dute. Neurketa konparagarriak daudenean, hazkundeari buruzko informazioa ere eman dezakete.
Erregistro horiek bestelako datu biologikoekin eta arrantza-datuekin uztartuta, aurrera egin daiteke marrazoen eta flotaren arteko elkarrekintza handiena zer eremutan eta garaitan gertatzen den zehazten. Ezagutza horrek populazioen ebaluazioak hobetzen laguntzen du, baita espezieen biologiara eta arrantza-jarduerara egokitutako kudeaketa-neurriak bideratzen ere.
Marrazo urdina tretza-flotarentzat intereseko espeziea denez, haren joan-etorriei buruzko informazioak arrantza-eremuetan duen presentzia hobeto ulertzen laguntzen du. Eskifaien lankidetzak kanpaina zientifikoetatik harago zabaltzen du ikerketaren irismena, eta sektorearen eguneroko jarduera baliabideak kudeatzeko ezagutza erabilgarriaren sorrerarekin lotzen du.
Ikerketa eta arrantza-jarduera lotzea, kudeaketa hobetzeko
Blueshark proiektuak marrazo urdinaren eta marrazo muturmotzaren banaketa eta migrazio-ereduak aztertzen ditu Bizkaiko golkoan, baita euskal flotarekin non eta noiz bat egiten duten ere. Helburua da elkarrekintza-eremuak identifikatzea eta espezie horien ustekabeko harrapaketak eta arrantzak eragindako hilkortasuna murrizteko neurriak bideratuko dituen ezagutza sortzea.
Horretarako, AZTIk markaketa-programetan duen esperientzia datu biologikoen eta arrantza-jarduerari buruzko datuen analisiarekin uztartzen du. Flota profesionalarekin eta aisialdiko arrantzaleekin etengabe lankidetzan aritzeak benetako arrantza-baldintzetan informazioa lortzeko aukera ematen du, baita sektorearentzat nahiz baliabide horiek ebaluatu eta kudeatzen dituzten erakundeentzat garrantzitsuak diren galderei heltzekoa ere.
Ibilbide horrek emaitza aitzindariak eman ditu dagoeneko: 2024an, AZTIk ia urtebete lehenago markatutako patudo bat berriz harrapatzeak espezie horrek Bizkaiko golkoarekiko duen fideltasunaren lehen ebidentzia zientifikoa eman zuen.
Marrazoen kasuan, jarraipenari esker, Bizkaiko golkotik Atlantikoko beste eremu batzuetara egindako joan-etorriak erregistratu ahal izan dira, besteak beste, Azoreetara eta Cabo Verdera. Halaber, ikusi da ale batzuk espero baino denbora gehiago egoten direla golkoan. Emaitza horiek oinarri hartuta, hipotesi bat planteatu da: eremu horrek marrazo pelagikoen espezie batzuen ugalketan edo kumeen hazkuntzan zeregina izan dezakeela. Aukera hori argitzeko, ikertzen jarraitu behar da.
Programa horien bidez, AZTIk laguntzen du kudeaketa-erabakiak hartzeko oinarri sendoagoa izaten, migrazio handiak egiten dituzten espezieen biologiari eta joan-etorriei buruzko ezagutzan oinarrituta.
