Mendi larreen kontserbazioari buruzko ikerketa batek NEIKER saria jaso du euskarazko dibulgazio artikulurik onenari

Bizkaia

Urtero zientzia eta teknologiari lortutako gai eta ikerketen euskarazko zabalkundea aitortzen duten CAF-Elhuyar sarien parte da

NEIKER sari bereziaren bigarren edizioa da, nekazaritza-abeltzaintza eta basogintza sektoreari lotutako ikerketetarako, eta saria Eusko Jaurlaritzako Nekazaritza, Arrantza eta Elikadura Politikako sailburuorde Bittor Orozek eman du, 2.000 euroren zenbatekoarekin.

Saritutako artikuluan, Iñaki Odriozolak bere doktore tesia laburtu du, zeinean aziendak modu tradizionalean eta jasangarrian gobernatuta mendiko larreetan duen eragina aztertzen duen

cafelhuyar11Iñaki Odriozola Larrañaga ikertzailearen lan batek, “Euskal mendiak: herbiboro handiek zizelkatutako paisaiak” izenekoak, NEIKER sari berezia irabazi du, CAF-Elhuyar sarien esparruan. Sariak euskarazko dibulgazioa aitortzen eta sustatzen du, nekazaritza- abeltzaintza eta basogintzari lotutako gai eta ikerketen inguruan.

Sariaren epaimahaiak lanaren kalitate narratiboa eta sakontasuna nabarmendu du; Iñaki Odriozola ekosistemen biodibertsitate, funtzionamendu eta kudeaketari buruzko ikertzailea eta doktore aditua da, eta lana bere doktore tesian oinarrituta dago. Artikuluan, artzaintza mistoak (ardiak, behiak eta behorrak) Aralarreko Mendilerroko paisaian eta biodibertsitatean duen eragina azaltzen saiatzen da. Artikuluaren ondorioa da funstezkoa dela azienda tradizionala modu jasangarrian kdueatzea mendiko larreak kontserbatuko badira. Lanaren arretagunea paisaia eta biodibertsitatea dira, baina beste parametro interesgarri batzuk ere neurtzen ditu, esaterako, lurraren temperatura.

Saria 2.000 eurorekin eta Imanol Andonegi artistaren eskultura batekin hornituta dago, eta Eusko Jaurlaritzako Nekazaritza, Arrantza eta Elikadura Politikako sailburuorde eta NEIKEReko lehendakari Bittor Orozek entregatu du.

NEIKER-Tecnalia eta Elhuyar hitzarmena

Saria NEIKER-Tecnaliaren eta Elhuyar Fundazioaren artean 2016ko uztailean ikerketaren arloan euskara sustatzeko hasi zen hitzarmenaren parte da.   Elhuyarrekin izenpetutako hitzarmenean sartzen dira nekazaritza sektoreari lotutako hiztegi espezializatu baten garapenean laguntzea, NEIKER-Tecnaliak Zientzia Azokan parte hartzea, gazteei sektoreari buruzko ikerketa helarazteko, eta aipatutako NEIKER sari berezia, nekazarizta-abeltzaintza eta basogintza sektoreari lotutako ikerketen euskarazko dibulgazioa saritzeko.

Partekatu

Beste berri batzuk