Poliklinika Gipuzkoak Euskadiko osasun pribatuaren 3 teslako lehen erresonantzia magnetikoa instalatu du

Atzo, asteartea, ekainak 16, iritsi zen, eta uztailaren erdialdean pazienteek erabiltzeko prest egongo da

Astearte goizean, 3 teslako erresonantzia magnetiko berria iritsi zen Poliklinika Gipuzkoara, aurreko ekipoa (1,5 teslakoa) baino ahalmen handiagoa duena. Euskal osasun pribatuaren hiru teslako lehen erresonantzia magnetikoa da, eta uztailaren erdialdean egongo da martxan. Haren abantaila nagusia da askoz bereizmen eta zehaztasun handiagoko irudiak eskaintzen dituela, garun-eremurako eta bizkarrezur-muinerako bereziki baloratuak.

Irudi estatikoez gain, prozesu dinamikoen irudiak ere eskain ditzake, hala nola jarduera neuronalarenak, oso baliagarria baita garuneko kirurgiak egiteko eta metabolitoak detektatzeko, eta horrek tumoreen diagnostiko goiztiarra egiten laguntzen du. Garunaren funtzionamenduaren irudiak denbora errealean lortzeko aukera ematen du. Eta gauza bera gertatzen da aktibazio neuronalarekin, gertatzen den unean ikusteko aukera ematen baitu.

Bestalde, erresonantzia berria erosoagoa da pazientearentzat. Ohatila berria baxuagoa da, eta, beraz, irisgarriagoa da. Zarata %90 murrizten da, 200 kilo bitarteko pazienteak igo daitezke, probak egiteko denbora %30 murriztu da, eta pazientearentzako espazioa ia %25 handitu da. Ondorioz, klaustrofobia duten pertsonak lasaitu egiten dira probak egitera joaten direnean.

Isabel Simónek, Poliklinika Gipuzkoako Irudi bidezko Diagnostiko Medikoaren Zerbitzuko arduradunak, adierazi duenez, “hiru teslako erresonantzia magnetiko berriak potentzia handiagoa eta teknologia hobetuak eskaintzen dizkigu. Eskaintzen duen balio diferentzialetako bat da bihotz-erresonantziak egiteko aukera emango digula, orain arte ez baikara egiten ari. Irudiaren eta funtzioen kalitatea hobetzeaz gain, erosoagoa da pazientearentzat: zabalagoa, argitsuagoa eta azkarragoa”.

Isabel Simónen arabera, hiru teslako erresonantzia magnetikoaren beste aplikazioetako bat da “egin ezin ditugun azterketak egiteko aukera, hala nola ehunen funtzioak aztertzeko aukera”.

Sonia Roussel, Quirónsalud Gipuzkoako Zuzendari mediku-asistentzialaren hitzetan, “hiru teslako erresonantzia magnetikoaren ekarpen nagusia, batetik, erresonantzia anatomiko handiagoa eta, bestetik, irudiak lortzeko azkartasuna dira. Horri esker, miaketa berriak egin daitezke, tamaina txikiko lesioak ikus daitezke eta zalantzak argitzeko gaitasuna hobetzen du, irudiaren fidagarritasuna askoz handiagoa baita”.