TECNALIAk hiru plataforma disruptibo abiarazi ditu, eraldaketa digitala bizkortzeko
Superkonputazio-zentro bat, Data Lab bat eta hodei pribatu bat bateratzen dituzte parekorik gabeko azpiegitura horiek, proiektu digitalak lantzeko edozein eremutan eta modu integralean
Haiek garatzeko, enpresa-sareak digitalizatzen dituzten Arista, Dell, Nvidia eta Red Hat nazioarteko etxe liderrekin batera aritu dira lankidetzan
Plataformak TECNALIAren instalazioetan daude, eta, gaur egun, 100 proiektutik gora garatzen ari dira, 60 enpresa baino gehiagorenak
TECNALIA ikerketa eta garapen teknologikoko zentroak, enpresa-sareen digitalizazioko Arista, Dell, Nvidia, eta Red Hat nazioarteko liderrekin batera, KATEA abiarazi dute, enpresen eraldaketa digitalerako plataforma aitzindariak. Berdinik ez duten azpiegitura digitalak dira: superkonputazio-zentro bat, Data Lab bat eta hodei pribatu bat bateratzen dituzte, proiektu digitalak lantzeko edozein eremutan eta modu integralean.
TECNALIAren instalazioetan daude plataforma horiek, hiru euskal probintzietan, eta gaur egun 60 enpresa baino gehiagoren ikerketa aplikatuko 100 proiektutik gora garatzen ari dira.
Aitzol Zubizarreta da arduraduna, eta adierazi duenez, “enpresen premiei aurrea hartzeko eta haien proiektuetarako punta-puntako azpiegiturak emateko sortu ditugu plataforma hauek. Modu horretan, berrikuntzarako eta eraldaketa digitalerako bidea erraztuko dugu, eta proiektuak ingurune seguru eta azeleratu batean egin ditzaten ahalbidetuko dugu, enpresak lehiakorragoak izan daitezen merkatuan”.
Berrikuntza irekia
3 milioi eurotik gora inbertitu dira TECNALIAren plataforma irekietan, eta haien helburua da berrikuntza irekia eta lankidetza eraginkorra erraztea aliatuekin eta ikerketa-eragileekin. Enpresa-sareak digitalizatzen dituzten Arista, Dell, Nvidia eta Red Hat nazioarteko etxe liderrekiko lankidetzari esker sortu dira plataformak.
Dell etxeak azpiegituren hardwarea ekarri du; Nvidiaren (merkatuko liderra da High Performance Computing inguruneetan) hardwareak kalkulu konplexuen abiadura eta eraginkortasuna hobetzen du, funtsezkoa baita ikerketa zientifikoan eta berrikuntza teknologikoan; Red Hat etxearen softwarea plataformen oinarria da; eta Aristak TECNALIAren sare-azpiegitura fabrikatu du, barne direla plataformak elkarri konektatzen dizkieten sareak. Zenbait fabrikatzailerekin lankidetzan, Econocom, Teknei eta NTT etxeek plataforma berriak osatzen dituzten soluzio teknologikoen integratzaile gisa parte hartu dute.
Plataforma teknologiko aitzindariak
TECNALIAren plataforma teknologikoek hiru laborategi bateratzen dituzte, kate-begi gisa: Research Cloud, Data Lab eta Compute Platform.
Lehenik eta behin, Research Cloud hodei pribatu bat da, Red Hat erakundearen oinarri teknologikoen bidez eraikia. Teknologia horrek TECNALIAri aukera ematen dio proiektu eta enpresa bakoitzerako ekosistema digital pertsonalizatuak sortzeko, halako moldez non une oro osagai guztien 360 graduko ikuspegia edukiko baitute. Plataforma IaaS formatuan kontsumitzen da (azpiegitura zerbitzu gisa); haren bidez, TECNALIAk azpiegitura eskain diezaieke bere bezeroei. Red Hat etxeak eskaintzen dituen soluzio teknologikoak inplementatuta, ahalmen hauek lortu dira, besteak beste: makina birtualak, sareak eta biltegiak zabaltzea eta kudeatzea eta enpresa-esparrurako aplikazioak abiaraztea ingurune seguruagoan eta malguagoan.
Alberto Torres Moreno Red Hat-eko Business Development Manager for Red Hat OpenShift & Application Development-ak adierazi duenez, “harro gaude TECNALIArekin lankidetzan KATEA garatzeaz. Lankidetza gure DNAren parte da, eta kode irekiaren printzipioen arabera garatu dugu gure softwarea, gure ekosistema zabalak hodei hibrido irekiko edozein ingurunetan erabili ahal izan dezan; horrek balio handia ematen digu. Kode irekian oinarritutako ikuspegi kolaboratibo horri esker, errazago integratu gaitezke zenbait enpresak parte hartzen duten proiektuetan. KATEA adibide bikaina da lankidetzak berrikuntza eta eraldaketa digitala bultza ditzakeela erakusteko”.
Bestalde, Juan Meca Dell Technologies etxeko Director Comercial Corporateak adierazi duenez, “Dell Technologies-en badakigu zenbaterainoko garrantzia duen berrikuntza bultzatzeak, eta soluzio teknologiko sendo, fidagarri eta eraginkorrak erabiltzen ditugu horretarako. Gure PowerEdge hardwarea TECNALIAren KATEA plataforma digital berrien oinarria da. Lankidetza honi esker, soluzio digitalen garapena eta optimizazioa bizkortzen dira, inbertsio-itzulkin ukigarriak lortzen dira, eta hazkunde teknologikoa oro har eta I+G+B inguruneetakoa bultzatzen da, bereziki, adimen artifiziala aplikatzeari dagokionez”.
Bigarrenik, Data Lab datu-espazio komun bat da, zeinean ikertzaileek proiektuetako datu maisuetarako, laborategi zehatzek sortutako datuetarako eta TECNALIAko eraikinetan bertan sortutako datuetarako irispidea baitute beren plataformatik. Plataformaren bidez, espazio berean bateratu nahi dira jatorri eta eremu oso desberdinetako datuak, TECNALIAko ikertzaileek eta enpresek ustiatu ditzaten, lehendik dauden lan-ildoak optimizatzeko eta elkarlanean ikerketa-lerro berriak sortzeko.
Eta, hirugarrenik, PetaFLOP batetik gorako potentzia duen prestazio handiko Compute Platform zenbaketa-klusterra, aplikazio zientifiko eta teknologiko aurreratuetarako prestazio handiko kalkulu-ahalmenak eskaintzen dituena. Plataforma espezializatuta dago AAko ereduen entrenamenduan, inferentzian, simulazioan eta egituren eta materialen azterketan, bai eta Matlab, Jupyter Notebooks, R Studio eta beste tresna batzuen bidez kalkulu konplexuak egiten ere.
NVIDIAko Javier Pemánek azaldu du garrantzitsua dela “eremu pribatuak tokiko ikerketa bultzatzea, betiere eredu berriak garatzeko, lehendik dauden ereduak enpresen premietara doitzeko eta industriak behar dituen kasuetara aplikatutako inferentzia optimizatzeko. Modu horretan, AA benetan erabiltzea bizkortuko da, eta inbertsio-itzulkinak daudela frogatuko da, adimen artifizialaren inguruko kapital intelektuala garatzearekin batera”.
Aristaren teknologiak ahalbidetzen du KATEA osatzen duten hiru plataformak bateratzea eta konektatzea. Hari esker, TECNALIAk bere komunikazio-sare guztiaren ikuspegi osoa du denbora errealean, eragiketen segurtasuna eta arintasuna bermatzeko.
