AFMk 245 milioi euroko EBEPE bat koordinatuko du makina-erremintaren eta fabrikazio aurreratuaren sektorea eraldatzeko
AFM, Makina-Erreminten, Osagarrien, Osagaien eta Erreminten Elkartea, hainbat enpresaren ideiak biltzen aritu da azken hilabeteotan, Ekonomia Berroneratzeko eta Eraldatzeko Proiektu Estrategiko (EBEPE) baten proposamena prestatzeko eta koordinatzeko
Helburua da jauzi disruptibo bat sustatzea fabrikazio aurreratuaren sektorean, digitalizazioan oinarritutako proiektu eraldatzaile baten bitartez. e-Machine, Digital Workshop izenburupean, produktuen balio erantsia eta pisu teknologikoa areagotzea da proiektuaren xedea, aldi berean enpresen zerbitzuen fakturazioa handituz baliabide digitalei esker. Era berean, prozesuek ingurumenean duten eragina txikitu eta haien eraginkortasuna handitu nahi da, industriaren trantsizio ekologikoaren alde eginez. Azkenik, pertsonengan jartzen da arreta, industriarako teknologia digitaletan kualifikazio handia duten langilez osatutako ekosistema bat sortu nahian.
e-Machine, Digital Workshop proiektua hiru tresnaren inguruan ardaztu da, inpaktu handiko 44 jarduketa sortzeko, askotariko ekintzak harturik barnean: bai I+Gkoak, bai lehen ezarpen industrialekoak, teknologia gaitzaileen inguruan, hala nola adimen artifiziala, 5G, simulazioa eta biki digitala, fabrikazio gehigarria edo blockchain. Proiektuan mobilizatuko den inbertsio pribatua 245 milioi eurokoa izango dela zenbatetsi da, eta fabrikazio gehigarriaren balio-kateko eragile guztiek esku hartuko dute: makineria fabrikatzaileak (makina-erremintak, osagaiak, kontrola, ikuskapen-ekipoak, eta abar), askotariko sektoreetako mekanizazio-tailerrak (automobilgintza, aeronautika, energia, burdinbideak, eta abar) nahiz «erabiltzeko prest» ematen diren sistemen hornitzaileak. Guztia ere elkarlan bizian, hala azpiegitura fisiko, logiko eta finantzarioen hornitzaileekin nola alor zientifiko eta akademikoko ordezkari nabarmenekin (esaterako, teknologia-zentroak edo prestakuntza-zentroak).
Beste sektore bezero batzuekin ere lankidetzan arituko da e-Machine, Digital Workshop, eragin traktorea ugaritzeko kideko proiektuen bitartez, elkarrekiko sinergiak eta ikaskuntza bilatuz.
Zenbatespenen arabera, zuzenean eta zeharka 2.625 enplegu sortuko ditu e-Machine, Digital Workshop proiektuak exekuzio-aldian, eta zuzeneko beste 2.600 enplegu ondorengo urteetan; gainera, 2,8ko eragin biderkatzailea izango du beste industria batzuetan. Orobat, sektorearen fakturazioa % 14 haziko dela eta manufaktura-industriak BPG nazionalari egindako ekarpena hiru puntu gehituko dela espero da. Guztira, 106 emaitza teknologiko sortuko dira prototipo, erakuskari, software eta metodologien artean, eta jabetza intelektualeko 73 espedienteren bitartez babestuko dira.
e-Machine, Digital Workshop proiektua AFMren R3 ekimenaren esparruan kokatzen da. Ekimen horren bidez, Espainiako ekoizpen-eredua eraldatu eta industriak BPG nazionalari egiten dion ekarpena handitu nahi da, epe labur, ertain eta luzeko ekintzak eginez.
