CIC biomaGUNEren Irudi Molekular eta Funtzionalaren Plataformara bisita gidatuak

Azaroaren 7an eta 8an lehen aldiz bisitatu ahal izango da, bai enpresak bai publiko orokorra, Espainiako Parke Teknologikoen Elkarteak antolatutako APTE Berrikuntza Guneak ekimenaren esparruan

Espainiako Parke Zientifiko eta Teknologikoen Elkarteak (APTE) bultzatutako Berrikuntza Guneak ekimenari esker, azpiegitura mota horiek «erreferenteak» izango dira komunitate zientifikoan, enpresetan, gizarte zibilean eta administrazio publikoetan.

Zehazki, Euskadiko Parke Teknologikotik CIC biomaGUNEren Irudi Molekular eta Funtzionalaren Plataforma hautatu da, Donostiako Campusean.

Irudi molekular eta funtzionalaren plataforma erreferentziazko instalazioa da Europan, irudi aurrekliniko molekular eta funtzionalaren eremuan. Instalazio hau, bere teknika esperimentalen baturagatik – erradiokimika, positroien emisio bidezko tomografia (PET), fotoi bakarraren emisio bidezko tomografia konputerizatua (SPECT), tomografia konputerizatua (CT), erresonantzia magnetiko bidezko irudia (MRI) eta tomografia optikoa (OT) –, baita AAALAC kalitatearen nazioarteko akreditazioa duen animaliategia ere, orain arte sortu den irudi biomedikoaren plataforma teknologiko handiena da, ez bakarrik Euskal Autonomia Erkidegoan, baita Estatuan ere, eta batez ere biomedikuntzan nanomaterialen aplikazio berriak garatzera bideratuta dago.

CIC biomaGUNEk azaroaren 7an eta 8an irekiko ditu ateak, azpiegitura berezi hori sakonago ezagutzeko bisita gidatuetan, eskaintzen dituzten gaitasunak eta aukerak ikusarazteko eta sustatzeko.

Azaroaren 7an, osteguna, bisitak enpresei eta erakundeei zuzenduta daude, eta azaroaren 8an, ostirala, bisita publiko orokorrari irekita egongo da.

NOLA PARTE HARTU BISITETAN

Bisita gidatuetara sartu ahal izateko, izena eman behar duzu hemen klik egin eta inprimakia beteta.

Ezin duzu aukera paregabe hau galdu!