CIC energiGUNEk antolatutako ‘BatSum23’ bateriei buruzko Europako konferentziak, ‘Europako teknologia propioaren’ garapenari balioa ematen dio, Euskadi adibide gisa nabarmenduz
Euskadiko Parke Teknologikoen Vitoria-Gasteizko Campusa, Baterien Europako Ekosistemari buruzko ‘BatSum23’ jardunaldiaren bigarren edizioa hartu du. Kontinenteko politika estrategikoaren arduradun nagusiek bertan ohartarazi dutenez “jada ez dago araurik baterien munduko lasterketa teknologikoan, eta beharrezkoa da erabaki bateratuak eta azkarrak hartzea”
Michel Armand ikertzaile ospetsua CIC energiGUNEko Ohorezko Zuzendari Zientifiko izendatu ondoren, Arantxa Tapia Eusko Jaurlaritzako Ekonomiaren Garapen, Jasangarritasun eta Ingurumen sailburuak adierazi duenez, “Euskal Autonomia Erkidegoak Europan bateria ekosistema paregabea eratzeko baldintzak betetzen ditu, Basquevolt bezalako proiektu nabarmenekin” eta Basquevolt bezalako ekimenak jarri ditu adibidetzat
CIC energiGUNEk, energia elektrokimikoaren biltegiratzean, energia termikoaren biltegiratzean eta bihurtzean eta hidrogenoaren teknologietan erreferentea den euskal ikerketa-zentroak, Europako baterien ekosistemako 150 ordezkari baino gehiago bildu ditu Gasteizen, “bateria elektrikoen iraultza” aztertzeko eta “Europak bere teknologia propioa lortu behar duela” egiaztatzeko, “beste herrialde eta kontinente batzuekin mundu-lasterketa irabazteko”. Ildo horretan, Euskadi bezalako eskualdeetan egindako lana nabarmendu egin da jardunaldian, eta “apustu hori are sendoagoa izango da datozen urteetan” adierazi du Arantxa Tapia Eusko Jaurlaritzako Ekonomiaren Garapen, Jasangarritasun eta Ingurumen sailburuak ekitaldiaren amaieran.
Michel Armand irakaslea, egoera solidoko baterien “aita” eta euskal zentroko erreferentziazko ikertzailea CIC energiGUNEko ohorezko zuzendari zientifiko izendatu eta berehala egin ditu adierazpen horiek Tapiak. “Ohore handia da; nire onena emango dut erantzukizun hori betetzeko”, adierazi du Armandek bere kargu berriaren ikur den ohorezko “makila” jaso ondoren.
Tapia Sailburuak bere hitzaldian adierazi duenez, bateriaren euskal ekosistemaren egungo arrakasta funtsezko hiru zutabetan oinarritu dela (enpresak, zentro zientifiko-teknologikoak eta unibertsitateak), eta horiek Euskadi erreferentziazko eragile bihurtu dute bateriaren arloan, abangoardiako proiektuei esker. “Laster zuek hemen berriro ikustea espero dut, Basquevolt-en instalazioak bisitatzen”, esan die sailburuak Gasteizen bildutako Europako ekosistemako ordezkariei.
Jardunaldia 9:00etan hasi da, inaugurazio ofizialarekin. Inaugurazioa Nuria Gisbert CIC energiGUNEko zuzendari nagusiaren, Ana Oregi Lurralde eta Klimaren aldeko Ekintza Saileko zinegotzi ordezkariaren, eta Pilar García de Salazar Arabako Foru Aldundiko Ekonomia Garapen eta Lurralde Orekako foru diputatuaren eskutik etorri da. Bere esku-hartzean, Gisbertek baterien sektorea Europan lan egiteko eta teknologia garatzeko bultzatzen ari den aukera handiak azpimarratu ditu, eta Oregik eta García de Salazarrek bat egin dute esatean “Gasteizentzat eta Arabarentzat harro egoteko modukoa dela Lurraldean CIC energiGUNE bezalako zentro garrantzitsua egotea”.
Irekiera ekitaldiaren ondoren, lau hitzaldi nagusi izan dira. Robert Dominko Ljubljanako Unibertsitateko ikertzaileak, BATTERY 2030+ ekimen europarraren zuzendaritzako kideak, ohartarazi duenez, “bateriak adimentsuagoak izatea lortu behar dugu, eta, horretarako, oso alderdi zehatzak hobetu behar dira, hala nola gelaxken sentsoreak edo autokonponketarako gaitasuna”. Johan Söderbom Innoenergyko Smartgrids eta biltegiratze arduradunak adierazi duenez, “gaur egun elektro-mugikortasuna da baterien merkatuaren eskariaren buru, baina ez da gutxietsi behar biltegiratze egonkorraren eskaria, industrian tentsioak saihesteko”. Halaber, mugarri gisa aipatu ditu “ibilgailu elektrikoen eta errekuntzako ibilgailuen artean dagoeneko lortu den prezioen parekotasuna” eta “ion-sodio teknologiaren garapen oparoa, litioaren ordezko gisa”.
Bestalde, Wouter IJzermans BEPAko zuzendari exekutiboak ohartarazi duenez “beharrezkoa da Europan balio-kate eta industria lehiakorra sortzea; horretarako, besteak beste, hezkuntza eta trebetasunak hobetu beharko dira”. Azkenik, Stefan Wolf VDI-VDEko taldeburuak, IPCEI izenekoak (Europako Interes Komuneko Proiektu Garrantzitsuak) aurkeztu ditu, eta Europako Hegoaldeko egoeraren errepasoa egin du, IPCEIak parte-hartzaile berriei irekita daudela gogoraraziz.
Jarraian, bi eztabaida-mahai burutu dira, mugikortasunaren eta biltegiratze egonkorraren sektoreei eta horiek etorkizunean izango duten proiekzioari buruz eztabaidatzeko. Lehenengoan, Francisco Carranza BASQUEVOLTeko CEOak, Txomin Nieva CAF Power and Automationeko teknologia zuzendariak, Mikel Lorente ACICAE-AICeko zuzendari teknikoak eta Soraya Romo BCAREko zuzendari nagusiak hartu dute parte.
Biltegiratze egonkorraren egoera eta etorkizuna aztertu duen bigarren mahaian hauek hartu dute parte: Jose Ignacio Hormaeche Euskadiko Energiaren Klusterreko zuzendari nagusiak; Igor Cantero Batiq-eko zuzendari nagusiak; Pilar González, Perseo-Iberdrolako Berrikuntza Zuzendaritzako ordezkariak; Jon Ander López Jema Energy-ko energia-biltegiratzeko aplikazioetarako produktuaren arduradunak; eta Josu Arrinda Ingeteam-eko BESS arloko zuzendari teknikoak. “Arrakasta ez dago prezioan edo kostu txikian; jarreran eta bateriaren inguruan eskaini ditzakegun zerbitzuetan dago”, ziurtatu dute.
CIC energiGUNEtik adierazi den bezala, bigarren urtez Gasteizen egin den topaketa horrek arrakasta handia izan du bertaratzeari eta hedapenari dagokienez, eta Euskadi Europan bateria arloko funtsezko erreferentzia-puntu izatea eta kontinentean gauzatzen ari diren ekimenen ikuspegi orokorra lortzeko aukera paregabea izatea lortu nahi duen hitzordua finkatu du.
