Euskadiko Parke Teknologikoa Robotekin erakundearen «hub» arekin bat egiten du, funtsezko eragile gisa proiektu estrategikoak sortzeko
60 enpresa eta erakunde publiko inguruk osatzen dute dagoeneko Robotekin, Robotikaren eta Automatizazioaren sektoreari lotutako enpresen eta eragileen arteko ekosistema kooperatiboa
Euskadiko Teknologia Parkeak bat egin du «Robotekin» delakoarekin, hau da, Robotika eta Automatizazioaren Euskal Elkartearen «hub» arekin. Dagoeneko martxan dago eta gaur egun 60 enpresa eta erakunde publiko inguru ditu teknologikoki aurreratuak diren sektore horietan lan egiteko.
Robotekin erakundearen ordezkarien hitzetan, Euskadiko Teknologia Parkeak «zeregin garrantzitsua du enpresen, unibertsitateen eta erakundeen arteko harremana eta teknologiaren eta ezagutzaren transferentzia sustatzen, eta, horrez gain, lan proaktiboa egiten du herrialdeko enpresa-proiektuak erakartzeko eta laguntzeko, bereziki Euskadiko RIS3 espezializazio adimenduneko estrategiarekin (industria adimenduna barne) bat egiten duten sektore eta merkatuetan .»
Bestalde, Euskadiko Parke Teknologikoko zuzendari nagusi Itziar Epalzak adierazi duenez, “robotikaren eta automatizazioaren sektoreari lotutako enpresen eta eragileen arteko ekosistema kooperatibo gisa, Robotekin aliatu estrategikoa da Teknologia Parkearentzat, eta, beraz, gure atxikimendua aliantza hori ahalik eta gehien indartzera bideratuta dago”.
Robotekin
Ekimen hori osatzen duten guztiek lan egiten dute «konfiantzan oinarritutako aukera inklusiboa izan dadin gizartearentzat». Horretarako, Robotekin proiektuaren helburua hainbat puntu estrategikotan oinarritzen da: nazioarteko talentuaren bultzatzaile, inbertitzaile eta kalitatezko enplegu izatea, RyA-ren “startup” direlakoen azeleratzaile izatea, bokazio profesionalerako prestatzaile espezializatuak izatea, jardunbide egokiei buruz sentsibilizatzea eta horiek aitortzea, teknologia- eta negozio-proiektu berriak bultzatzea, industriaren eskura dauden balio-zerbitzuak areagotzea benetako beharrei erantzunez, tokiko eta nazioarteko eragileen arteko zubi bat izatea eta lehiakortasuna hobetzea.
