BCAREk Ramón Ugarte izendatu du zuzendari nagusi, enpresaren hurrengo hazkunde-etapa gidatzeko

Zuzendari berriak ibilbide zabala du energia-biltegiratzean, negozio-garapenean eta nazioartekotzean

BCAREra batu da konpainia teknologikoki sendotzen eta hedatzen ari den une batean

BCAREk, CIC energiGUNEren lehen spin-offak eta energia-biltegiratzearen industriarako balio erantsiko zerbitzuetan erreferente den enpresak, Ramón Ugarte izendatu du zuzendari nagusi, hazkundea bizkortzeko, merkatuan duen posizionamendua indartzeko eta energia-biltegiratzearen industriarako dituen soluzio eta zerbitzuen irismena zabaltzeko helburuarekin.

Ugartek esperientzia zabala du energia- eta industria-sektoreetan, bereziki energia-biltegiratzearen alorrean. BCAREra batu aurretik, zortzi urte baino gehiagoz jardun zuen CEGASA Energían; 2020tik Merkataritza Zuzendaria izan zen, eta litio-ioizko energia-biltegiratze soluzioen negozio-garapena gidatu zuen energia berriztagarrietako eta merkataritza- zein industria-aplikazioetarako. Aurretik, negozio-garapenean eta produktu-kudeaketan erantzukizuneko postuak izan zituen CEGASAn, Pasaban Taldeko DUTTen eta IKORen; horri esker, nazioarteko ibilbide sendoa eta merkatu teknologiko eta industrialen ezagutza sakona sendotu ditu.

“BCAREk ezagutza teknologikoa, ingeniaritza-gaitasuna eta industria-proiektuetan gero eta esperientzia handiagoa uztartzen ditu. Nire helburua potentzial hori hazkunde jasangarri bihurtzea da: negozio-aukera berriak garatzea, bezero eta bazkideekin epe luzeko harremanak sendotzea eta gure soluzioak merkatu eta aplikazio berrietara eramatea, bai estatuan bai nazioartean”, adierazi du Ramón Ugartek.

Ugarte BCAREren bilakaera- eta heldutasun-etapa batean sartu da. Konpainiak bere proposamena zabaldu du aholkularitzatik, saiakuntzetatik eta diagnostikotik baterien bizi-ziklo osoa modu integralean estaltzera: teknologia-hautaketa eta -ebaluazioa, karakterizazioa eta degradazioaren analisia, sistemen ingeniaritza eta integrazioa, BMSen eta eredu aurreratuen garapena, aurreserien eta battery pack-en fabrikazioa, eta monitorizazio- eta diagnostiko-soluzioak.

Posizionamendu horrek industriaren aitortza ere jaso du. 2024an, Iberdrola Españak BCARE saritu zuen Urteko Hornitzailearen Sariarekin, Trantsizio Energetikoaren kategorian, haren proposamen berritzailea eta parte hartzen duen proiektuekiko konpromisoa baloratuz. Bereziki, erabilgarritasuna, erantzuteko azkartasuna eta produktuak epean eta eskatutako kalitatearekin entregatzeko gaitasuna nabarmendu zituen. BCAREren bilakaera teknologikoa bereziki islatzen da garapen berrietan. ASTRA-CC proiektuan, 2023-2025 HAZITEK programaren barruan eta Iberdrola Taldeko i-DEk gidatuta, BASQUEVOLTek eta BCAREk egoera solidoko zelulak garatu eta aplikazio geldikorretarako modulu funtzional batean integratu zituzten. Lankidetza horrek euskal egoera solidoko baterien ekosistemaren posizionamendua indartzen du Europan.

Konpainiak, gainera, gero eta dibertsifikatuagoa den ibilbide teknologiko eta industriala du: smart grid-etako baterietarako monitorizazio- eta diagnostiko-sistemak garatu ditu, BESS sistemetarako kalitate-kontroleko prozedurak, eta telekomunikazioetan zein elektromugikortasun arinean lan egin du. Horri gehitzen zaio Ni-Zn teknologiei (LOLABAT) eta sodio-bateriei (MUSIC) buruzko Europako proiektuetan parte hartzea. Industrializazioaren, digitalizazioaren eta kimika berrien konbinazio horrek azpiegitura kritikoei, biltegiratze geldikor aurreratuari eta sortzen ari diren beste merkatu batzuei erantzuteko gaitasuna indartzen du.

Izendapen honekin, BCAREk etapa berri bat bultzatu nahi du, hazkunde komertzialean, produktu eta zerbitzuen dibertsifikazioan eta bere soluzioen industrializazioan eta nazioartekotzean oinarritua, berrikuntza teknologikoa konpainiaren zutabe nagusietako bat izaten jarraituz.