Euskal industriak teknologia kuantikoaren aplikazio errealak aztertzen ditu

Euskadiko Parke Teknologikoak eta GAIA klusterrak enpresak, zentro teknologikoak, unibertsitatea eta ekosistema kuantikoko eragileak bildu dituzte Zamudio/Derio Campusean

Euskadiko Parke Teknologikoak eta GAIA klusterrak jardunaldi bat egin dute, teknologia kuantikoek eskaintzen dituzten benetako aplikazioak eta aukerak euskal enpresei hurbiltzeko, “Zeintzuk dira teknologia kuantikoen abantailak zure enpresarentzat?” lelopean.

Topaketan BasQ, Biqain, red.es, Tecnalia, Ayesa, LKS Next, Quantum Mads eta Euskal Herriko Unibertsitateak (EHU) parte hartu dute, eta zibersegurtasunarekin, energiarekin, biki digitalekin, robotika industrialarekin, hornidura-kateen optimizazioarekin eta 5G/6G komunikazioekin lotutako hainbat erabilera-kasu aurkeztu dituzte.

Jardunaldian zehar, teknologia horiek enpresa-sarean sartzeak dakartzan erronka nagusiei ere heldu zaie, eta B2B bilerak egin dira enpresen eta eragile espezializatuen artean.

GAIAtik, Cristina Murillok, zuzendari nagusiaren ondokoak, balio handiko esperientzia-ekimen gisa baloratu du topaketa, “merkatu-erronken aurrean sortzen ari den teknologia horren aplikazio errealak sakonki aztertzeko aukerari buruz”. Jardunaldiak ikertzaileen, enpresarien eta adituen arteko gertuko elkarrizketa erraztu du, “agerian utziz teknologia kuantikoak euskal industriako funtsezko sektoreak eraldatzen hasi direla, hala nola energia, osasuna, garraioa, logistika eta fabrikazio aurreratua”, adierazi du.

Ildo horretan, topaketako kasu praktikoen aurkezpenak ikuspegi argia eman du teknologia kuantikoak prozesuak hobetzeko, baliabideak optimizatzeko, lehiakortasuna areagotzeko eta irtenbide berritzaileak eskaintzeko duen ahalmenari buruz, “horrela, gure eskualdeko garapen teknologiko eta ekonomikorako zutabe estrategiko gisa duen eginkizuna sendotuz”, ondorioztatu du Cristina Murillok.