Michel Armand, CIC energiGUNEko erreferentziazko ikerlaria, munduko ikertzaile garrantzitsuenetako gisa aipatzen da berriro Clarivate Analytics-en urteko txostenean
“Highly Cited Researchers”, munduko komunitate zientifikoak egindako lanen erreferentzia kopuruaren arabera urtero munduko zientzialari aipatuenak biltzen dituen zerrendak, CIC energiGUNEko elektrokimika arloko ohorezko zuzendari zientifikoa sartu du berriro 2024ko txostenean
Duela gutxi Stanfordeko Unibertsitateko “Ranking of World Scientists” zerrendan maila guztietan Euskadiko ikertzailerik garrantzitsuena gisa aintzatesia izan den Michel Armand proiektu berrietan ari da lanean gaur egun euskal zentroan, hala nola uztailaren 8tik 11ra Gasteizen egingo den eta bera ekitaldiaren “Chair” gisa arituko den ‘Power Our Future 2025’ Kongresuan
Michel Armand, CIC energiGUNEko, energia elektrokimikoaren biltegiratzean eta bihurketan eta energia termikoaren biltegiratzean eta bihurketan erreferentea den euskal ikerketa-zentroko ikerlari garrantzitsua, ikerketa zientifiko eta akademikotik datozen datuak aztertzen eta biltzen espezializatutako Clarivate Analytics enpresa britainiarrak urtero eguneratzen duen nazioarteko erreferentziazko zerrenda zientifikoan agertzen da berriro. Armand Highly Cited Researchers 2024 txostenean agertzeak –txosten horretan mundu osoko zientzialariek urtean zehar sarrien aipatu dituzten ikerlariak agertzen dira– agerian uzten du bere ikerketen eragin iraunkorra eta bere ibilbide luzea.
“Zalantzarik gabe, harro egoteko modukoa da Michel urtez urte munduko ikertzaile garrantzitsuenen ranking nagusietan agertzea, eta horrek agerian uzten du gure ikerketa-jardueraren eragina”, adierazi du Nuria Gisbert CIC energiGUNEko zuzendari nagusiak. “Zorionez, sortu ginenetik, Armand Irakaslea, erronka berrietan laguntzeko gai den oso maila altuko ikertzaile-talde bat mentoratuz joan da.
Ildo horretan, Euskal zentrotik gogorarazten da Armand Irakaslea, Ohorezko Zuzendari Zientifikoa izateaz gain, etorkizuneko ibilgailu elektrikoaren egoera solidoko bateria lortzera bideratutako CIC energiGUNEko lantaldearen koordinatzailea ere badela, eta bere lana funtsezkoa dela etengabe eraldatzen ari den sektorearen erronkei erantzuteko. Izan ere, Michel Armandek protagonismo berezia izango du CIC energiGUNEk Gasteizen uztailaren 8tik 11ra antolatuko duen eta energia biltegiratzearen sektoreko nazioarteko eragile nagusiak bilduko dituen ‘Power Our Future’ Kongresuan. Armand izango da ekitaldiko “Chair”-a, bere esperientzia eta ikuspegi berritzailea baterien etorkizunari buruzko eztabaida eta analisira ekarriz.
Aipatu behar da “askotan aipatutako ikertzaileak” zerrenda Web of Science™ aipamenen indizean gehien aipatzen diren artikuluen bidez lortzen dela, eta artikulu horiek euren ikasketa-eremuan urte berean gehien aipatzen direnen % 1en parte direla. Era berean, Armand doktorea Clarivate Analyticsen txostenean sartzea bat dator komunitate zientifikoaren nazioarteko erreferentzia nagusia den Stanfordeko Unibertsitateko “Ranking of World Scientists” zerrendan duen presentziarekin. Aurten ere, Michel Armand Euskadiko maila guztietako ikertzailerik garrantzitsuen gisa aipatzen da, Estatuko erreferente nagusia da Energiaren arloan, eta 14. postuan dago mundu mailan.
Izan ere, mundu mailan duen eraginak bere ibilbide indibiduala gainditzen du, bere ikerketa-lana oso lotuta baitago 2019an John Goodenoughi eta Stanley Whittinghami emandako Kimikako Nobel Sariarekin. Armandek patente bat lankidetzan eta argitalpen bat ditu Goodenough-ekin. Azken horrek, 2016an, CIC energiGUNEko Ohorezko Zuzendari Zientifikoaren lana aintzatetsi zuen publikoki eta berariaz, 40 urteko ibilbide zientifikoagatik egin zitzaion omenaldian, “elektrolito polimerikoaren garapenean aitzindari gisa” egindako lana eta litio ion LFP baterien teknologia hobetzeko egindako apustua nabarmenduz.
Erreferentziazko ibilbidea
1946an Frantzian jaioa, Michel Armand 80ko hamarkadaren amaieran hasi zen litiozko bateria kargagarriak ikertzen –polimero solidoaren elektrolitoarekin egindako konbinazioaren bitartez–. Horri esker, besteak beste, garatu ahal izan dira ibilgailu elektrikoari lotutako teknologia nagusiak. Gaur egun, CIC energiGUNEren elektrolito solidoaren ikerketa-arloko arduraduna da, eta etorkizuneko ibilgailu elektrikoaren egoera solidoko bateria lortzera bideratutako lantalde bat koordinatzen du.
Armand irakasleak hainbat aintzatespen jaso ditu zientziaren arloan, 2000. urteko Volta domina, 2010eko Galileo saria, 2012ko Aymé Poirson saria eta 2016ko Catalán-Sabatier saria, besteak beste. Era berean, Honoris Causa Doktore da Deakingo, 2006an, eta Upsalako, 2016an unibertsitateetatik, eta 2022ko urrian “Fellow of The Electrochemical Society” sariarekin aintzatetsi zuen Atlantan ECS erakundeak. Nazioarteko aldizkarietan argitaratutako 416 argitalpenen egilea edo egileetako bat da, 295 aurkezpen egin ditu hitzaldietan eta 200 patente aurkeztu ditu edo aurkeztekotan da. Gainera, 30 doktoretza tesi zuzendu ditu, eta horietako hiru EHUkoak, Euskal Herriko Unibertsitatekoak, dira.
2011n hasi zen CIC energiGUNErekin harremanetan, “Energia, Bateria eta Superkondesadoreen biltegiratze” Arloko Batzorde Zientifikoan sartu zenean. Aldi berean elektrolito polimerikoen ikerketa-taldearen sorrera zuzendu zuen. Azpimarratu behar da elektrolito solidoari buruzko zentroaren ikerketa-lerroa Europa mailako bost lerro nabarmenen artean dagoela gaur egun.
