NEIKER animalien tuberkulosiaren aurkako txerto bat garatzen ari da

Zenbait ikerketa proiektutan ere parte hartzen du, gaixotasunaren diagnostikoan interferentziak eragiten dituzten bakterioak identifikatzeko, eta horrek lagundu egingo luke infektatuta ez dauden animaliak hiltzea saihesten

Gaur tuberkulosiaren munduko eguna da, eta hori da NEIKERen lehentasunezko ikerketa ildoetako bat

Gaur, martxoak 24, Tuberkulosiaren Munduko Egunarekin bat eginez, NEIKERek gaixotasun hori zaintzearen garrantzia azpimarratzen du, bere lan ildoetako bat baita. NEIKEReko Animalia Osasuneko Departamentuko laborategietan Euskadiko basoko espezieen gaixotasun kopuru handi baten prebalentzia monitorizatzen da, eta horien artean daude estatuko zaintza planean planteatutakoak, hala nola tuberkulosia.

Ildo horretan, gainera, NEIKER animalien tuberkulosiaren aurkako txerto bat garatzeko lanean ari da. Hasierako helburua basurdean tuberkulosia kontrolatzea izan zen, beste erkidego batzuetan arazo handia baita, baina gerora beste espezie batzuetan lan egin da, hala nola oreinean, azkonarrean eta txahaletan. Kasu guztietan, BCG txertoarekin lortutako baino ondorio hobeak edo parekoak ikusi dira, hura erreferentziazko txertotzat jotzen delarik, pertsonengan erabili izan dena.

NEIKERek, Animalia Osasuneko Departamentuaren bidez, batez beste 150 basurde eta oreinen laginak aztertzen ditu urtero tuberkulosia detektatzeko. Bakartutakoen ehunekoa txikia da, aztertutako animalien %1,1 ingurukoa. Hala ere, basa faunaren zaintzak berebiziko garrantzia du, gaixotasun batzuk, besteak beste, hegazti gripea, txerri izurria edo tuberkulosia, abeletxeetara irits daitezkeelako animalia horien bidez.

Sakrifizioak positibo faltsuengatik

Analisietan, Mycobacterium tuberculosis Konplexukoak ez diren beste mikobakterio batzuk ere aurkitu ohi dira, tuberkulosoak ez diren mikobakterio esaten zaienak. Horietako batzuek ez dute osasun inplikaziorik, baina animalien tuberkulosia desagerrarazteko programetan erabiltzen diren diagnostiko tekniketan eragiten dute, eta positibo faltsuak ematen dituzte. Horrek tuberkulosirik ez duten animaliak hiltzea eragin dezake, eta horrek alferrikako kostua dakar.

NEIKER bi ikerketa proiektutan ari da lan egiten: bat EBk finantzatzen du (Interreg-POCTEFA) eta bestea Zientzia eta Berrikuntza Ministerioak (MICINN), tuberkulosiaren diagnostikoan interferitzen duten bakterioak identifikatzeko, eta horien presentziaren ondorioz diagnostikorako erabilitako tekniken emaitzak aldatzea galarazteko.

Gainera, txertaketaren bidez gaixotasuna kontrolatzeko azterketan sakontzen da, eta sortuko den prototipoa izango da azterlanetan sartuko direnetako bat, NEIKERen garatzen ari diren beste batzuez gain.

NEIKER ospe handiko beste erakunde batzuekin batera ari da proiektu horietan parte hartzen, horien artean egonik Frantziako Tolosako Unibertsitatea eta ANSES, Kataluniako Bartzelonako Unibertsitate Autonomoa eta IRTA-CRESA eta VISAVET, Madrildo Unibertsitate Konplutentseari atxikitako eta Europako Erreferentziazko Zentroa Mycobacterium bovisi dagokionez.

Tuberkulosia basa faunan

Tuberkulosia gaixotasun zoonotikoa da, hau da, animalietatik gizakietara pasa daiteke eta alderantziz. Tuberkulosia eragiten duten bakterioak hainbat dira, eta Mycobacterium tuberculosis konplexuan biltzen dira. Normalean, Mycobacterium tuberculosis izeneko bakterioak gizakiari eragiten dio, eta animalietan, berriz, Mycobacterium bovis edo Mycobacterium caprae aurkitzen dira gehiago. Hala ere, hori gustu kontua baino ez da, agentea ostalarira egokitu izanaren ondoriozkoa.

Etxeko abereen artean, behiak eta ahuntzak dira kalte gehien nozitzen duten espezieak. Animalia horiei ezartzen zaizkien desagerrarazpen programek eta esneak merkaturatu aurretik edo esnekiak egin aurretik jasaten duen tratamendu termikoak arrisku zoonotikoa minimizatu dute. Dena dela, basa faunak ere pairatzen du gaixotasuna, eta infekzio iturri izan daiteke etxeko animalientzat eta gizakiarentzat, eta haren kontrola zailagoa da.