Athina Kanioura, PepsiCoko presidenteordea, Euskadiko Parke Teknologikoan: “AAk ez du enplegua suntsituko, baina funtsezkoa da etorkizuneko lanaren indarra gaurtik diseinatzea”

Vitoria-Gasteiz Campuseko eraikin nagusian talentu digitalari, berrikuntzari eta emakumeen lidergoari buruzko hitzaldi magistrala eman du gaur Athina Kanioura doktoreak, PepsiCoko mundu mailako Estrategia eta Eraldaketa arduradun eta presidenteordeak

Kanioura doktorea nazioarteko erreferentea da STEM esparruan, eta Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburuak harrera egin dio, PepsiCok eskualdearekin duen konpromisoa eta konpainiaren ikuspegia eta lorpenak partekatuz

Euskadiko Parke Teknologikoak Vitoria-Gasteiz Campusean duen eraikin nagusiak Athina Kanioura doktorearen, PepsiCo konpainiaren presidenteorde exekutibo eta mundu mailako Chief Strategy and Transformation Officer-aren, hitzaldi magistrala hartu du gaur eguerdian. Hitzaldian nabarmendu duenez, “Adimen Artifizialak ez ditu lanpostuak suntsituko, baina beharrezkoa da etorkizuneko lanaren indarra gaurtik diseinatzea eta teknologian benetan sinestea”.

Kanioura doktorea, STEM arloko nazioarteko erreferentea, Euskadin da bisitan Euskadiko Parke Teknologikoko Vitoria-Gasteiz campusean dauden PepsiCoren instalazio berriak ezagutzeko. Bertan instalatu du konpainiak bere Hub Digital Globalaren parte bat. Testuinguru horretan, eta M8 Emakumeen Egunaren ospakizunarekiko gertutasuna dela eta, Euskadiko Parke Teknologikoak jardunaldi hori egitea sustatu du. Jardunaldian Parke enpresetako 80 ordezkari inguruk parte hartu dute.

Hitzaldiaren lehen zatian, Kanioura doktoreak emakumeen talentua sustatzeari, erakartzeari eta atxikitzeari buruzko argudio nagusiak azaldu ditu, eremu digitalean batez ere. “Euskadin aurkitzen dugun ekosistemak, Euskadiko Parke Teknologikoa bezalako inguruneek eta EHU eta Mondragon Unibertsitatea bezalako unibertsitateekin duten lotura estuak sustatuta, gure ikuspegi teknologikoa ezagutarazteko eta talentuari aukerak eskaintzeko aukera ematen digu”, ziurtatu du.

PepsiCoko presidenteordeak adierazi duenez, “PepsiCon gure jardueraren bihotzean jarri ditugu AA eta datuen analisia, izan ere AA konplexua den eta kontsumitzaileari bideratuta dagoen enpresaren eragiketak iraultzen ari da”. Ildo horretan, Kaniourak ziurtatu duenez, “erabat konektatuta dagoen ekosistema hori izatea lehiarako abantaila da, eta are gehiago indartzen da PepsiCorentzat berariaz pertsonalizatutako teknologiarekin”.

Jarraian, galderen txanda zabala ireki da, eta bertan enpresak gehien kezkatzen dituzten gaietako batzuk planteatu dira, hala nola AAk enpleguan izango duen eraginaren aurreko beldurra. “Adimen artifizialak ez du enplegua suntsituko, baina funtsezkoa da etorkizuneko lan-indarra diseinatzea”, ziurtatu du Athina Kaniourak.

Mikel Jauregi Eusko Jaurlaritzako Industria, Trantsizio Energetiko eta Jasangarritasuneko sailburuak harrera egin dio Athina Kaniourari. PepsiCo Estrategia eta Eraldaketarako Hub Globalaren zati bat Gasteizko Campusean ezartzeari buruz hitz egin dute, baita adimen artifizialak bere negozio-ereduaren eraldaketan dituen onurei buruz ere.

Aipatzekoa da Vitoria-Gasteiz Strategy and Transformation Hub, 100 profesional baino gehiagorekin, PepsiCoko ekosistema digitalaren funtsezko zati bat dela, gaitasun digitaletan eta eraldaketa digitalean oinarritua, “eta horrek gure tokiko lehiakideengandik bereizten gaitu, AAk giza konexioak ahalbidetzen dituela eta gure profesionalen eta nekazaritzaren arloko pertsonen arteko esperientzia errazten duela kontuan hartuta”, ziurtatu du PepsiCoko presidenteordeak.

Ibilbide profesionala

Athina Kanioura doktorea PepsiCoko Presidenteorde Exekutiboa, eta Chief Strategy and Transformation Officer da. Berritzailea eta liderra eraldaketan, Kaniourak PepsiCoren estrategia integrala gainbegiratzen du, arrakasta ziurtatzeko, bai maila korporatiboan, bai merkatu giltzarrietan, digitalizaziorako estrategia barne. Konpainiaren eraldaketa globalaren buru ere bada, PepsiCoren tamaina eta irismena hazkundea bizkortzeko aprobetxatuko direla bermatuz, Datu Produktuen, Plataformen eta Talentuaren arloak gainbegiratzeaz gain.

Era berean, Kanioura doktorea Royal Statistical and Economics Societyko kidea da, eta datuen erabilerari buruzko gobernu politikak formulatzen laguntzen du NDF bezalako erakundeetan. Marketin Zientzien Institutuko kontseiluko kide ere bada, eta UMISTen (Erresuma Batua), Imperial College Londonen (Erresuma Batua) eta Sheffieldeko Unibertsitatean (Erresuma Batua) irakatsi duen irakasle sutsua da. Azken horretan Ekonometrian eta Ekonomia Kuantitatiboan doktoretza lortu zuen.

Bestalde, PepsiCo munduko enpresa liderretako bat da elikagaien eta edarien sektorean, 320.000 langile baititu 200 herrialde baino gehiagotan. Konpainia 1965ean sortu zen, eta berrikuntzarengatik eta merkatuaren joeretara egokitzeagatik nabarmentzen da, hala nola aukera osasungarriago eta jasangarriagoen aldeko eskarira. Gainera, PepsiCok jasangarritasunarekiko eta erantzukizun sozialarekiko konpromiso sendoa du, eta, horrek, ekonomia globalean ez ezik, enpresa jardunbide arduratsuen eta jasangarrien sustapenean ere eragile garrantzitsu bihurtzen du.