CIC energiGUNEk, energiaren biltegiratzean Europako zentro garrantzitsuenen Top 3an itxi zuen 2019ko ekitaldia
![](https://parke.eus/wp-content/uploads/2024/01/CICenergiGUNE_Balance2019-scaled-2.jpg)
Euskal zentroa kontinenteko erreferente nagusi gisa finkatu da egoera solidoan dauden baterietan, ikertzaile ezagunak, Michel Armand, besteak beste, buru dituen lantalde profesionalaren lanari esker, eta baita Europa Hegoaldeko Prototipatu Laborategi aurreratuenak barne hartzen dituzten punta-puntako instalazioei esker ere
Europako Batzordeak CIC energiGUNEren garrantzia aintzatetsi du; izan ere, bateriei buruzko H2020 deialdian finantzaketa eta proiektu gehien lortu dituen estatuko zentroa izan da, %46ko arrakasta-tasarekin. Horrez gain, Europako Batzordearen HR Excellence in Research bikaintasun-ziurtagiria lortu du pertsonen kudeaketan
Arabako Parke Teknologikoa topaketa profesional garrantzitsuen agertoki izan da aurten, irailean baterien ikerketarako Europako ekosistemaren ordezkari nagusiak bildu zituen “Batteries Summit”, besteak beste
CIC energiGUNE, energia elektrokimikoa eta termikoa biltegiratzearen arloan Europan erreferentea den ikerketa zentroak, 2019ko ekitaldia itxi du. Europako hiru ikerketa zentro nagusietako bat da sektore horretan. Aurten arte, euskal zentroak 600 argitalpen baino gehiago eta 13 patente bildu ditu, kontinenteko ekimen garrantzitsuenetako (Batteries Europe eta Batteries 2030+) partaide da, eta Europako hegoaldeko erreferentzia nagusia bilakatu da.
“Egoera hori lantalde handi batek egindako ahaleginaren emaitza da, eta baita erakundeen konpromiso iraunkorraren, beste eragile batzuekin aurrera eramandako lankidetzaren eta gugan konfiantza izateko zalantzarik izan ez duten erreferentziazko enpresekin izan dugun elkarlanaren emaitza ere”, adierazi du Nuria Gisbert CIC energiGUNEko zuzendari nagusiak. Bere iritziz, erakundearen indargune nagusietako bat talentua erakartzeko gaitasuna da, lehen mailako profesional taldeari –Michel Armand ezaguna buru dela– eta punta-puntako instalazioei esker. Instalazio horietan, baterien Prototipatuen instalazioak eta biltegiratze termikoko sistemen prototipatuen laborategia (aire eta olio lotura termikoen bidez osatutakoa, besteak beste) azpimarratu behar dira.
Europa mailako “Batteries Summit” goi-bilera irailean egin zen Arabako Parke Teknologikoan, eta mugarria izan zen zentroaren jardueran. Handik gutxira, Europar Batasunak Horizon 2020 programara aurkeztutako 11 proiektuetatik 5 onartu zituen, “Baterien Belaunaldi Berria” atalaren barruan. Izan ere, euskal zentroa izan zen Estatu osoan finantzaketa gehien lortu zuen erakundea, %46ko arrakasta tasarekin, Espainiako batez besteko %12,1aren gainetik.
“Lan bikaina egin dugu ekitaldi honetan, baina garrantzitsuena Euskadiko eta Europako industriaren berehalako erronkei erantzuteko oinarriak jarri ditugula da, eta ezin diogu aukera honi ihes egiten utzi”, adierazi du Nuria Gisbertek. Horrela, zuzendari nagusiak, epe laburrean/ertainean Europak 400Gwh-tik gorako bateria ahalmena ekoizteko gaitasuna beharko duela gogorarazi du, eta BMW, Daimler eta Volkswagen bezalako automobilgintzako enpresa nagusiak baterien etorkizuneko teknologien garapenaren buru izaten ari direla. “CIC energiGUNE oso ondo dago kokatuta hurrengo bateria-teknologien garapenean, eta eskuz esku egiten du lan sektoreko Europako eragile nagusiekin. Bestalde, ez da ahaztu behar Euskadi oso indartsua dela garapenak industrializaziora eramaten. European Battery Alliance-k jarduteko unea orain dela nabarmendu du; 2028an Europak baterien merkatu osoaren %25etik gorako merkatu-kuota izatea aurreikusten da, eta Europa Hegoaldeko gune sendoena Euskadi izango da, bere enpresa eta eragile ekosistema bereziari esker”, ziurtatu du Gisbertek.
Lantalde anitza eta parekidea
Plantillari dagokionez, zentroak 120 ikertzaile ditu gaur egun, eta parekotasuna ikusten da generoari eta jatorriari dagokienez. Izan ere, profesionalen %50 Euskaditik kanpokoak dira, 14 nazionalitate desberdinetakoak. Elena Palomo eta Energiaren arloan Estatuko zientzialari garrantzisuena den Michel Armand bezalako ikertzaile ezagunen presentziak talentua erakartzen eta eusten laguntzen du.
Bestalde, iaz, CIC energiGUNE erreferentziazko zentro gisa onartua izan da egoera solidoko Erresonantzia Magnetiko Nuklearreko (RMN) tekniketan, eta bikaintasun-ziurtagiri bi lortu ditu kudeaketan: Europako Batzordearen HR Excellence in Research, eta ikerkuntzan eta transferentzian bikaintasuna kudeatzeko ereduari buruzko UNE 166002:2014 araua bete izanaren ziurtagiria.
Era berean, urte horretan CIC energiGUNE BRTA Euskal Aliantza Teknologikoko kide bilakatu da, beste 15 eragile zientifiko-teknologikorekin batera, Eusko Jaurlaritzaz, Foru Aldundiez eta SPRIz gain. Helburua lankidetzarako dinamika ziurtatzea da, Euskadiren etorkizuneko erronka teknologikoei eta industrialei erantzun ahal izateko eta nazioartean duen posizionamendua hobetzeko.
Amaitzeko, aipatu behar da zentroko profesionalek 100 konferentzia baino gehiagotan hartu dutela parte urtean zehar, eta bertan 20 ekitaldi antolatu direla. Horrez gain, 2019an industriarekin 42 kolaborazio egin dira.