Innobasque nazioartean aitorturiko errealitatea da, lehentasun estrategiko baten -Berrikuntzaren- alde lan egiten duena

  • Iñigo Urkullu lehendakariak eta Innobasqueko ohorezko presidenteak eman dio hasiera Berrikuntzaren Euskal Agentziaren Batzar Nagusiari eta esan du “aldaketa garaiak bizi ditugula eta garai hauek berrikuntza behar dutela”. Gaineratu du “funtsezkoa dela Jaurlaritzarentzat eta Euskadirentzat Innobasque alboan izatea”, eta Innobasqueren lana “abangoardia” dela baieztatu du.
  • Batzarrean Innobasque 2012-2013 Txostena aurkeztu da, non Urkulluk jakinarazten duen “Eusko Jaurlaritzak 5 milioi euroko inbertsioa bideratzen duela berrikuntzara astero”.
  • Alberto García Erauzkin Innobasqueko presidenteari bere lana berretsi zaio, eta esan du agentzia “Euskadin, Espainian eta nazioartean aitorturiko errealitate bat dela, lehentasun estrategiko baten ─berrikuntzaren─ alde” lan egiten duena, 27 herrialdetako 64 nazioarteko nodorekin konektatuta.
  • Ekonomiaren Garapen eta Lehiakortasunerako sailburua den Arantza Tapiak, Innobasqueko presidenteordeak, azaldu du Zientzia, Teknologia eta Berrikuntzaren Euskal Sareak, berrantolaketaren ondoren, bere emaitzak gehiago zuzenduko dituela merkatura. Sailburuaren ostean, sisteman funtsezkoak diren eragileek Euskadin berrikuntza nola bultzatu aztertu dute.

Innobasque_Batzar OrokorraIñigo Urkullu lehendakariak eta Innobasqueko ohorezko presidenteak gaur arratsaldean eman dio hasiera, Gipuzkoako Zientzia eta Teknologia Parkean, Berrikuntzaren Euskal Agentziaren bazkideen VII. Batzar Nagusiari. Berarekin batera izan dira Arantza Tapia, Ekonomiaren Garapen eta Lehiakortasunerako sailburu eta Innobasqueko presidenteordea, eta honek Zientzia, Teknologia eta Berrikuntzaren Euskal Sarearen berrantolaketaren onurak azaldu ditu; Jon Darpón, Osasun sailburua; Cristina Uriarte, Hezkuntza, Hizkuntza Politika eta Kulturako sailburua; eta Juan María Aburto, Enplegu eta Gizarte Gaietako sailburua: guztiak, beste 60rekin batera, Innobasqueko Zuzendaritza Batzordekoak dira, eta gaur Batzarraren aurretik bildu da. Alberto García Erauzkin Innobasqueko presidenteari agentziaren buru gisa egin duen kudeaketa berretsi zaio, eta berak esan du agentzia “Euskadin, Espainian eta nazioartean aitorturiko errealitate bat dela, lehentasun estrategiko baten ─berrikuntzaren─ alde” lan egiten duena, 27 herrialdetako 64 nazioarteko nodorekin duen konexioari esker, eta horien bidez euskal berrikuntza munduan zehar proiektatzen dela. Baita ere esan du Innobasqueri “aho batez aitortzen zaiola bestela elkartuko ez liratekeen eragile askoren dinamikak bildu, bat etorrarazi eta elkartzeko duen gaitasuna”.

Halaber, web berria aurkeztu da, non agentziako 1.000 bazkidek baino gehiagok protagonismoa duten eta beraien artean elkarlanerako leku paregabea. Baita ere ezagutarazi da Innobasque 2012-2013 Memoria, ikus-entzunezko eduki handiko produktu digitala, bazkide askoren parte-hartze handiarekin egina eta Innobasquek bi urteotan izan duen jardueraren berri ematen duena (ikus taula beherago) infografia, bideo, elkarrizketa, erreportaje eta artikuluen bidez. Esteka honetan klikatuz bideoak ikus daitezke erreferentziazko pertsona batzuen elkarrizketa eta hitzaldiekin. Memorian, Urkulluk azpimarratu du “Eusko Jaurlaritzak oro har 5 milioi euroko inbertsioa bideratzen duela berrikuntzara astero”.

Batzarrean egindako hitzaldian, Urkulluk esan du “aldaketa garaiak bizi ditugula eta garai hauek berrikuntza behar dutela, eta funtsezkoa dela Jaurlaritzarentzat eta Euskadirentzat Innobasque alboan izatea”. Erantsi du “Euskadik berrikuntzarekin konpromisoa duen gizartea behar duela, eta zentzu honetan Innobasqueren lana abangoardia dela”.

Merkatura bideratuagoa
Ondoren, Arantza Tapiak, Eusko Jaurlaritzako Ekonomiaren Garapen eta Lehiakortasuneko sailburuak, Zientzia, Teknologia eta Berrikuntzako Euskal Sarearen berrantolaketaren onurak azaldu ditu, honek bere emaitzak hobetu ditzan enpresentzat eta euskal gizartearentzat. Honela, Tapiak ziurtatu du Sarearen diseinu berriak garapen teknologikoari emango diola lehentasuna, inbertsio pribatu handiagoa erakartzeko; bere jarduera espezializazio adimendun mugatuen arloetara (fabrikazio aurreratu, energia, biozientzia eta osasunera) bideratuko duela eta zehatz-mehatz neurtuko dituela emaitzak eragile bakoitzak bere funtzioa betetzen duela bermatzeko. “ZTBESko eragileak funtsezko aktoreak izango dira Euskadiko industria-birjaiotzan”, aitortu du.

Ondoren, Itziar Alkorta, Eusko Jaurlaritzako Unibertsitate eta Ikerketa sailburuordeak; Asís Canales, Iberdrolako Erosketa eta Aseguru zuzendariak; Igor Vitoria, GMKTko zuzendari nagusiak; eta Eneko Pérez, Kibber kooperatibaren sortzaileetakoa eta Mondragon Unibertsitatekoak, Euskadik aurrean dituen erronkak aztertu dituzte “Berrikuntzan ekin eta ekin” mahai-inguruan. Honela, garbi geratu da Euskadik baduela bere berrikuntza-ekosistema, non hori osatzen duten eragile guztiak diren beharrezkoak aberastasuna eta ongizatea sortzeko. Honela, euskal zientziak azken urteotan izan duen hobekuntza nabarmena azpimarratu du Alkortak. Canalesek, bere aldetik, Iberdrolak jarraitzen dituen berrikuntza-ildoak aurreratu ditu, euskal trakzio-enpresa handietako bat izaki. Vitoriak teknologia-zentroek sortzen duten goi-teknologia errebindikatu du, horien parte-hartzerik gabe berea bezalako enpresa bat ez bailitzateke posible izango. Azkenik, Perez berritzaile gazteak euskal gazteen gaitasunak erakutsi ditu bere esperientzia kontatuz ekintzaile gisa India, Txina edo Estatu Batuetan.