Mariel Diaz, ADDIMAT erakundeko presidente berria
Joan den maiatzaren 13an, Fabrikazio Gehigarriko eta 3Dko Teknologien Espainiako Elkartearen (ADDIMAT) Batzar Nagusiak Mariel Diaz hautatu zuen elkarteko presidente gisa, Jaume Homs ordezkatuz
Mariel Diaz Triditive enpresa asturiarraren CEO eta sortzailea da; 2016an sortu zen, eta fabrikazio gehigarria automatizatzeko makinak eta software industriala garatzen ditu. Triditive enpresak mundu-mailako hainbat sari eta aitortza lortu ditu, eta bulegoak ditu Erresuma Batuan eta AEBn.
Diaz ingeniari mekanikoa da Oviedoko Unibertsitatean, eta ingeniari industriala Francisco José de Caldas Unibertsitatean (Kolonbia). Horrez gain, negoziazio-masterra du Harvard Unibertsitatean. Diaz irakaslea izan da Oviedoko Unibertsitatean, 3D Inprimaketa Masterrean, eta fabrikazio gehigarriko aditu gisa egin du lan Europako Batzordean eta Fraunhofer Institutuan.
Ingeniariak sari ugari jaso ditu, besteak beste Espainiako emakume ekintzaile onenaren saria 2018an, Secot Fundazioaren eta Repsolen eskutik; Women in Tech sari globaleko finalista 2020an, Startup kategorian; eta Nova Talent 2021 sariaren irabazlea Ingeniaritzan eta Energian. Diaz Asturiasko enbaxadorea da emakumeen 3D inprimaketan (Women in 3D Printing), eta Techstars oinarri teknologikoko enpresen munduko azeleragailu ezagunaren Alumni delakoa.
Diaz ADDIMAT erakundearen zuzendaritza-batzordean egon da 2019az geroztik, eta elkarteko presidenteorde izendatu zuten joan den urtean. ADDIMAT erakundearen presidente berriaren helburua da fabrikazio gehigarria eta etorkizuneko fabrikak sortzeko garrantziaren balioa azpimarratzea.
Triditive enpresako CEOarentzat garrantzitsua da bazkideak gertutik ezagutzea eta Espainian fabrikazio gehigarria hazteko lankidetza-espazioak sortzea, negozio-aukerak sortu ahal izateko. Azkenik, Diazek Espainian garatzen den fabrikazio gehigarriaren teknologia ikusarazi nahi dut ADDIMAT erakundetik.
ADDIMAT erakundearen batzarrean 2021eko jarduerak eta emaitzak aurkeztu zituzten; urte ona izan zen sektorearentzat salmentei eta elkarteari berari dagokienez. Izan ere, nabarmen hazi da, 19 enpresa bazkide sartu baitira. Gainera, 2022rako kudeaketa-plana onetsi zen, sektorearen hazkuntza sustatzeko eta Espainiako industrian fabrikazio gehigarriko teknologiak azkarrago ezartzeko ekimen berriekin.
Hiru aste baino gutxiago barru sektoreak Bilbon izango du urteroko hitzordua, ADDIT3D ekitaldiaren seigarren edizioarekin. Espainiako fabrikazio gehigarriarekin eta 3D inprimaketarekin lotutako ekitaldi komertzial garrantzitsuena da. Ekitaldian fabrikazio gehigarriko eta 3D inprimaketako teknologietara bideratutako sistema eta makinen azken aurrerapenak, fabrikazio gehigarriaren aplikazio industrialak, lehengaiak, kontsumigarriak, 3D inprimaketa-zerbitzuak, fabrikazio gehigarriko softwarea, eskanerrak, eta abar aurkeztuko dira. Azokan, gainera, Additive Talks jardunaldia egingo da, fabrikazio gehigarriarekin lotutako azken berriak aurkezteko. Ekainaren 16an egingo da.
ADDIMAT AFM Cluster erakundearen parte da, eta fabrikazio gehigarri eta digitalaren ekosistema ordezkatzen du. Sei elkarte industrialek osatzen dute, eta 16.500 pertsona enplegatzen dituzten eta 2.800 milioi euro baino gehiago fakturatzen dituzten 700 enpresa baino gehiago biltzen ditu.
