TECNALIAk biometanoaren ekoizpena handitzeko erreaktore bat garatu eta patentatu du
Milikanal-erreaktorea arrakastaz probatu da instalazio pilotu batean. Araztegi bateko benetako biogasa erabili da, eta frogatu da teknologiak funtzionatzen duela baldintza ia industrialetan
Gainera, teknologia hori edozein industria-instalaziotara egokitu daiteke. TECNALIA biometanoaren eta gas natural sintetikoaren lehiakortasuna indartzen duten soluzio aurreratuak eskaintzeko gai den Europako zentro gutxietako bat da
Energia-bektore horiek guztiz bateragarriak dira gas naturalaren sarearekin, eta gas berriztagarri hori gakoa izan daiteke elektrifikatzen zailak diren sektoreak deskarbonizatzeko
TECNALIA ikerketa aplikatuko eta garapen teknologikoko zentroak milikanal-erreaktore bat garatu eta patentatu du. Erreaktore horrekin, gas natural sintetikoa zuzenean lor daiteke biogasetik, barnean duen CO₂-a bihurtuz. Sistema horrek upgrading-prozesuaren efizientzia globala hobetzen du, eta urrats bakar batekin irteeran metano-kontzentrazioa % 95etik gorakoa izatea lortzen da.
Teknologia horrekin, biogasaren CO₂-aren balioa handitzeko soluzio aurreratuak eskaintzeko gai den Europako zentro gutxietako bat da TECNALIA. Prozesuak azken gasaren metano-edukia handitzen du, eta gas natural sintetikoaren lehiakortasuna indartzen du. Gas berriztagarri hori sarearekin guztiz bateragarria da.
Biogasean dagoen CO₂-aren metanazio-erreakzioa areagotzeko diseinatuta dago erreaktorea. Arkitektura milimetriko batean oinarritzen da, eta ohiko erreaktoreek baino askoz transferentzia-koefiziente handiagoak ematen ditu (bai beroarena, bai masarena). Horrela, puntu beroak sortzea saihesten da eta baldintza dinamikoetan ere modu egonkorrean jardun dezake. Era berean, diseinu modularra duenez, erreplika bidez eskalatu daiteke. Horregatik, eskala txikiko instalazioetara nahiz industria-instalazioetara egokitzeko aproposa da.
Erreaktorea TRL6 instalazio pilotu batean balioztatu da, heldutasun teknologikoa neurtzeko. Eraginkortasun handia du, emari-aldaketei azkar erantzuten die eta lehengaia ia erabat aprobetxatzen duela erakutsi da. Gas naturalaren sarean zuzenean injektatzeko moduko gas natural sintetikoa lortu da.
TECNALIAk erreaktorearen bideragarritasuna frogatu du Lointek, Repsol, Petronor eta Awaes (Tedagua) enpresekin elkarlanean.
Funtsezko energia-bektorea
Biometanoa eta gas natural sintetikoa energia-bektore gakoak dira elektrifikatzen zailak diren sektoreak deskarbonizatzeko bidean aurrera egiteko, hala nola industrian, garraio astunean edo prozesuko beroan. Egungo gas-azpiegituretan zuzenean integratu daitekeenez, trantsizio energetikoan laguntzeko berehalako soluzio eskalagarria da.
Espainiak 2030ean urtean 137 TWh-ko ekoizpen-ahalmena izango duela kalkulatzen da, hau da, egungo gas naturalaren kontsumoaren % 40. Hala, biometanoa energia-mendekotasuna murrizteko, segurtasuna indartzeko eta emisioak murrizteko bide estrategiko bat da.
Biometanoa eta gas natural sintetikoa nekazaritzako, abeltzaintzako, hiriko edo industriako hondakinetatik ekoizten da. Aukera ematen du hondakin-fluxuak gas berriztagarri bihurtzeko, eta, gainera, egungo azpiegiturekin guztiz bateragarria da. Horrela, landa-ingurunearen garapenari eta energia-autonomiari laguntzen die. Kudeatzeko erraza denez, energia berriztagarri elektrikoentzat osagarri oso erakargarria da, eta sistema energetikoari malgutasuna ematen dio. Horregatik, teknologia horren hedapena bizkortzeko asmo handiko helburuak ezarri dituzte REPowerEU ekimenean, beste batzuen artean. Autonomia energetikoan eta emisioen murrizketan izan dezakeen garrantzia aitortzen dute.
