Zamudiok zelulak hazteko “gela zuria” du
Zamudioko Teknologia Parkean kokatutako Histocell enpresak Espainian dauden lau “gela zurietako” bat barne hartzen du. Gela hori zuria da, esterila, hermetikoki itxia eta iragazkiz betea, bertako airea Pirinioetakoa baino garbiagoa da. “A” kalitateko airea, partikula flotatzailerik gabea. Izan ere, Histocell-en giza zelulak fabrikatzen dira. Kartilagoko zeluletan espezializatu dira, ehun hori kaltetuta duten eta, ez konponketa-kirurgiaren ez protesien bidez, ohiko medikuntzak konponbide ona eskaintzen ez dien pazienteentzat. Hurrengo proiektua sabelaldetik ateratako gantz zelula amak ezberdintzean datza, horrela hezur-zelulak lortuko dira hausturak ondo finkatuta ez dituzten pazienteei ezartzeko.
