Tumorearen progresioa geldiarazten duen mekanismo natural bat identifikatu dute ikerketa berri batean, eta minbizi oldarkorrenak aurreikusten lagun dezake
Nature Communications aldizkarian argitaratu den eta CIC bioGUNEk zein IBBTECek batera gidatu duten ikerketak ASPA proteina tumore-mikroingurunearen erregulatzaile giltzarri gisa identifikatu du, minbiziaren diagnostikorako eta tratamendurako bide berriak irekiz
Kantabriako Biomedikuntza eta Bioteknologia Institutua (IBBTEC-CSIC-Kantabriako Unibertsitatea) eta BRTAko kide den CIC bioGUNE buru dituen nazioarteko ikertzaile-talde batek hainbat minbizi motaren progresioa mugatzen laguntzen duen mekanismo molekular berria identifikatu du.
Nature Communications aldizkarian argitaratutako emaitzen arabera, ASPA proteinak erregulatzaile natural gisa jarduten du, minbiziarekin lotutako fibroblastoen aktibazioa eragotziz. Tumore-mikroinguruneko zelula horiek funtsezko zeregina dute tumoreen hazkundean, ehunen inbasioan eta metastasien agerpenean.
Aurkikuntzak tumore-mikroingurunearen garrantziari buruzko ebidentzia berriak eskaintzen ditu. Mikroingurune hori minbizi-zelulak inguratzen dituen ekosistema zelular konplexua da, eta gaixotasunaren bilakaeran eragin zuzena du. Minbiziak bere inguruko zelula osasuntsuak nola eraldatzen dituen ulertzea ikerketa onkologikoaren ildo nagusietako bat bihurtu da, elkarreragin horiek tumorearen oldarkortasuna eta tratamenduekiko duen erantzuna baldintza baititzakete.
Tumore-zeluletatik harago
Normalean, minbizia zelula gaiztoen ugalketa kontrolik gabearekin lotzen bada ere, tumoreak elkarren artean elkarreraginean aritzen diren askotariko zelulez osatuta daude. Horien artean daude immunitate-sistemako zelulak, odol-hodiak eta fibroblastoak, ehunen egitura eta funtzio normala mantentzeaz arduratzen direnak.
Hala ere, gaixotasuna garatzen den heinean, zelula horietako asko tumoreak berak birprogramatzen ditu, eta haren hazkundea sustatzen hasten dira. Horien artean nabarmentzen dira minbiziarekin lotutako fibroblastoak (CAFak, ingelesezko siglengatik), gaur egun tumore-mikroinguruneko osagai garrantzitsuenetakoak direnak, tumorearen progresioa sustatzeko, minbizi-zelulen hedapena errazteko eta tratamendu jakin batzuen aurrean erresistentzia areagotzeko duten gaitasunagatik.
Eraldaketa hori nola gertatzen den ulertzea lehentasunezko helburua da minbiziaren ikerketan, eta azken hamarkadetako aurrerapen esanguratsuenetako batzuk bultzatu ditu, immunoterapia barne.
ASPAk balazta natural gisa jarduten du
Testuinguru horretan, ikertzaile-taldeak ASPA identifikatu du minbiziarekin lotutako fibroblastoen portaeraren funtsezko erregulatzaile gisa.
Emaitzek erakusten dute tumorea aurrera egin ahala komunikazio konplexua ezartzen dela minbizi-zelulen eta ehuneko zelula osasuntsuen artean, eta horrek ASPAren mailak pixkanaka murriztea eragiten duela. Proteina hori desagertzen denean, fibroblastoek beren kontrol-mekanismo naturaletako bat galtzen dute, eta tumorearen hazkundea eta gaixotasunaren forma oldarkorragoen garapena sustatzen dituzten ezaugarriak hartzen dituzte.
Gainera, ikerketak erakusten du ASPAk erregulazio-funtzio hori betetzen duela TGFβ seinaleztapen-bidearen jarduera blokeatuz. Bide hori minbiziarekin lotutako fibroblastoen aktibazioaren eragile nagusietako bat da.
Ikuspegi diziplina anitzeko bati esker —analisi biokimikoak, zelula-ereduak, in vivo azterketak eta zelula bakarreko sekuentziazio-teknologia aurreratuak uztartuta—, ikertzaileek zehaztasun handiz karakterizatu ahal izan zuten ASPAk tumore mota desberdinetan duen eragina.
Balizko ondorio klinikoak
Azterlanaren aurkikuntza garrantzitsuenetako bat da ASPAren galera hainbat minbizi motaren bilakaera oldarkorragoarekin lotuta dagoela. Emaitzen arabera, proteina hori etorkizunean biomarkatzaile erabilgarri bihur liteke, gaixotasunaren progresiorako eta metastasiak garatzeko arrisku handiagoa duten pazienteak identifikatzeko.
Oinarrizko ikerketa bat den arren eta oraindik berehalako aplikazio klinikorik ez duen arren, lan honek bide berriak irekitzen ditu ASPAren potentziala jomuga terapeutiko gisa aztertzeko eta minbiziaren diagnostiko- eta tratamendu-estrategiak hobetzeko.
Ikerketa nazioarteko lankidetza zabal bati eta ikerketarako ezinbestekoak izan diren lagin biologikoak eman dituzten pazienteen eskuzabaltasunari esker gauzatu ahal izan da. Lanak Espainiako Minbiziaren Aurkako Elkartearen, Ikerketarako Estatu Agentziaren, European Research Councilen (ERC), ”la Caixa” Fundazioaren eta CRIS Minbiziaren Aurkako Fundazioaren babesa jaso du.
